Коалицијата предводена од СДСМ, „Можеме” има чесна понуда и професионални луѓе подготвени да работат за граѓаните. ВМРО-ДПМНЕ знае да владее само со ширење страв и неизвесност. Затоа гласајте, ќе продолжиме напред само ако вие така одлучите, изјави денеска носителката на кандидатската листа во Втората изборна единица Сања Лукаревска во Ѓорче Петров.
На средбата со граѓани на која присуствуваше и кандидатката за пратеничка Санела Шкријељ, Лукаревска рече дека СДСМ во изминатиот период покажала оти знае да постигнува успеси не само надвор, туку и внатре во државата.
– Во изминатите три години покажавме дека парите ги враќаме кај граѓаните, дека се грижиме за секој еден граѓанин и создадовме едно општество за сите. Влеговме во НАТО, отпочнуваме преговори со ЕУ. Градиме развојна економија, создаваме услови за успех на секој млад човек, рече Лукаревска.
Додаде дека во Волково во моментот се гради градинка која ќе биде со капацитет за згрижување на околу 170 дена и оти целта на СДСМ е младите да останат во државата, а не својата иднина да ја бараат надвор од државата.
– Излезете и гласајте, ова се важни избори. Избори на кои одлучувате кому ќе му ја доверите грижата за нашето здравје, за нашиот стандард, за европскиот пат на нашата држава, порача Лукаревска.
