Претседателот на Владата на Република Северна Македонија Зоран Заев заедно со министрите задолжени за економските ресори Фатмир Битиќи – заменик на премиерот задолжен за економски прашања и координација со економските ресори, Фатмир Бесими – министер за финансии, Арјанит Хоџа – министер за земјоделство, шумарство и водостопанство, Јагода Шахпаска – министерка за труд и социјална политика, Благој Бочварски – министер за транспорт и врски, Насер Нуредини – министер за животна средина и просторно планирање и Венко Филипче – министер за здравство, денеска имаа средба со претставници на Сојузот на стопански комори.
Премиерот Заев им порача на деловните луѓе, претставниците на најголемиот број на мали и средни претпријатија во државата, членки на Сојузот на стопански комори дека Владата е тука, да помогне и подаде рака на бизнис секторот.
„Неслучајно во првите денови од работењето на новата Влада сме на средби со нашите македонски комори затоа што фокусот е на економијата и правниот систем.
Државата е стабилна и постои да им помага на граѓаните, на стопанството и во дијалог со стопанските комори и синдикатите и сите учесници во општествениот живот ќе бидеме со намера за им служиме, да бидеме најдобар сервис и за време на коронакризата, за која најавуваат дека ќе продолжи следните 6 до 8 месеци.
Во такви околности, државата почна со процес на дискусија, дебата и консултации за креирање за следни пакети мерки за поддршка на стопанството, економијата и граѓаните.
Владата е стабилна, коалицијата што е формирана е силна, изградена на основа на вредности и испраќа порака на предвидливост, што е значајна за планирање и проекција на економските процеси и инвестиции. Најавуваме период од четири години каде што нема да има вонредни парламентарни избори“, истакна премиерот Заев и најави стабилен период и во даночната политика.
„Данокот на добивка останува на ниво од 10% и продолжуваме со одложување на аконтациите од данокот на добивка. Данокот на личен доход останува исто така на 10%, но остануваме доследни на воведувањето на правичното прогресивното оданочување преку инклузивен процес на разговори и дебата, која треба да биде од полза и на компаниите и на граѓаните. Останува и заедничката заложба за искоренување на сивата економија која е поголема од 30% и нанесува штета врз буџетот и парите на граѓаните и чесните фирми во нашата земја, преку мерки креирани заедно со УЈП, македонски царини и државните инспекции и преку зајакнување на инспекциските служби“, рече премиерот Заев.
Во однос на намалување и укинување на пара-фискалните давачки што се побарувања на стопанските комори, премиерот Заев рече дека таргет на новата Влада е до крајот на мандатот 75% од пара-фискалните давачки да ги отстранува и истовремено да има одредено намалување на даноци, со цел стимулирање на развој на економијата и новите информатички технологии и тоа скалесто до 2021 година од 18% на 5%, до 2022 на 3% и 2023 година на 0%.
Во делот на угостителството и туризмот, за ресторанските услуги ќе воведеме единствен данок од 10%“, заокружи премиерот Заев.
