За и против пуштање деца во градинка и училиште, враќање на работа на родителите на деца до 6 години, мерки на Владата и загрижени родители… полемиката попладнево ќе се пренесе на улица со протест и покрај владиното образложение за потребите од отворање на градинките, како и изјавите на министерот за здравство дека пандемијата најмалку ќе биде предизвик уште една година.
Полемиката се префрли и на социјалните мрежи. Не сите мајки се против владината одлука и со поддршка на мајките што сакаат да останат дома и да си ги чуваат децата, отколку во време на пандемија ги вратат назад во градинка. Со оглед дека градинката не е задолжителна, полемиката е кој ќе им ги чува децата додека тие се на работа?
По разните групи на Фејзбук може да се забележат коментари од типот: „реално, кога можеше се да се отвори можат и училиштата, нас кој не чувал кога сме биле деца?“, „небулозно е да не се отвораат училиштата. Враќањето на работа се однесува на администратвците, ние во приватниот сектор одамна работиме“, „дали знаете дека мајките, медицинаски лица, цело време одеа на работа, поради дефицит на кадар, немаа годишен одмор (или имаа по една недела), прашајте ги како се снаоѓаа со чување деца… или мајките во приватниот сектор и фабриките… “, „ако имаме потреба од работа ќе се снајдеме за чување деца, колку паразити има оваа земја, сè сакаме друг да ни ги реши проблемите, а ние само да критикуваме…“
Мајките на деца до шестгодишна возраст за денеска во 17:30 најавија протест пред Влада поради одлуката да им се прекине породилното отсуство и да се вратат на своите работни места. Министерот за здравство Венко Филипче смета дека тие треба да се вратат на работните места, затоа што со вирусот ќе мора да живееме и цел 2021 година и тоа ќе биде нашиот живот. Од Влада велат дека мерката е донесена во координација со Комисијата за заразни болести. Согласно Протоколот, велат од Влада, приоритет за згрижување во градинките имаат децата на самохраните родители и децата на двајца вработени родители, со што се исклучува секаква можност децата да останат без соодветна грижа и нега.
Одлуката сите родители на деца од 0 до 6 години, кои досега беа ослободени од работниот процес, да се вратат на работа почнувајќи од 23 септември сега за сега останува на сила.
Б. Јордановска
