Mинистерството за образование и наука (МОН) вели дека првиот училишен ден поминал успешно за најголем дел од учениците во државата. Бојкотирањето на наставата, пак, порачуваат од МОН, е на штета на децата.
„МОН укажува дека одлуката за следење настава со физичко присуство ја носат здравствените експерти. Следејќи ги нивните насоки, при организација на наставата МОН имаше два приоритети – заштита на здравјето на сите учесници во образовниот процес и обезбедување пристап до образование за секое дете. Бојкот на наставата целосно го деградира образовниот процес, а најголемата штета од ова ја трпат токму децата. Образовниот процес мора да продолжи – клучно за развојот на секое дете е да ја следи наставата, без разлика дали е тоа онлајн, или со физичко присуство“, велат од МОН.
Оттаму апелираат сите да останат посветени и одговорни бидејќи секој од нас е одговорен за заштита на јавното и на здравјето на децата.
Ваквите пораки на крајот од првиот училиштен ден доаѓаат откако во неколку училишта во земјава ученици и родители решија да протестираат барајќи физичко присуство на децата. Помеѓу оние кои протестираа и бојкотираа денеска имаше средношколци во Тетово, Струга и Дебар, родители на деца од училиштата во Македонска Каменица и Миравци.
Од МОН во соопштението испратено до медиумите вечерва, велат дека оваа година е несомнено различна од сите останати, но сите ученици имаат можност да следат настава и да бидат во континуирана комуникација со наставниците.
„МОН, заедно со сите учесници во креирање на онлајн платформата продолжува и понатаму будно да ја следи состојбата на терен. Надлежните власти продолжуваат да ја следат епидемиолошката слика во секоја општина и да носат одлуки согласно актуелната состојба“, велат од МОН.
