Претседателот на Собранието Талат Џафери денеска дојде во Кривичниот суд за да сведочи на рочиштето за „Организаторите на 27 април”.
Сведочењето на Џафери првично беше предвидено за 18 септември, но поради негови работни обврски беше одложено за денеска.
Претседателот на судечкиот совет, судијата Илија Трпков најави дека денеска ќе биде сослушан само Џафери заради обврски на обвинетиот Миле Јанакиески кој треба да присуствува и на други судења. Преостанатите сведоци ќе бидат сослушани на следното рочиште што го зкажа за 16 октомври во 10.30 часот
На претходно рочиште сведочеа неколку актуелни и поранешни пратеници на ВМРО-ДПМНЕ. Како сведо е повикан и поранешниот пратеник на Движењето Беса, Зеќирија Ибрахими, кој на 27 април 2017 години од говорницата на Собранието ја интонираше албанската химна.
Случајот за „Организаторите на 27 април” се наоѓа во доказна постапка. Овој предметот го води судијата Илија Трпков, а застапник на обвинението е Вилма Русковска.
Обвинети во овој предмет се поранешниот претседател на Собранието Трајко Вељаноски, ексминистрите за транспорт и врски и за образование, Миле Јанакиевски и Спиро Ристовски, како и поранешниот директор на УБК, Владимир Атанасовски. Тие се товарат дека сториле кривично дело „терористичко загрозување на уставниот поредок и безбедноста“.
