Иако пандемијата се одрази на модната индустрија исто како и на секој аспект од нашите животи, дизајнерите и модните креатори не хибернираа. Нивната постојана креативност конечно ќе ни дозволи да ги комбинираме оние работи кои досега беа едно големо „НЕ“.
Светки, мрежи, линии, цветни дезени, искинати и дречливи материјали со исто такви заштитни маски – ДА. На човештвото му треба нов издувен вентил, па откако главниот акцент последниве неколку месеци е на пандемијата, рестрикциите и забраните, како луѓе заслужуваме да прекршиме по некое модно правило. Но, нека затопли прво.
Најавените весели тонови и комбинации ќе ги видиме во пролетните колекции, а зимава веќе е дефинирана со пепито дезените, ретро големите палта „од нафталин“ и сакоата кои даваат комплетност и елегантност на речиси секоја комбинација, па дури и со патики.
Пролетта ќе биде одбележана со живи, дречливи бои и дезени, продупчени ракави, но и минималистички креации за оние кои најудобно се чувствуваат во едноставна облека.
Викторија Бекам во нејзината најнова колекција се фокусира токму на острите засеци и отворени делови на доста невообичаени места. Сепак, таа е позната по едноставните, но неверојатно впечатливи и препознатливи креации. Има и зошто е една од најомилените дизајнерки на Ана Винтур.
Со оглед на тоа што во преден план веќе е одржливоста и економичноста, многу дизајнери почнаа со пренаменување или повторна употреба и актуелизација на стари и неискористени парчиња како дел од нови комбинации. Гигантот за фармерки Левис почна да го рециклира и повторно да го употребува непродадениот текстил од минати сезони, Долче и Габана исто така ги искористуваат остатоците од минатото производство за нови модели.
Најинтересниот дел од новите колекции предвидени за пролет/лето 2021 се заштитните маски во исти дезени со облеката. Со оглед на тоа што веќе и по навика бираме маска што би ни одговарала со одбраниот стајлинг за тој ден, заштитните маски освен потребни, стануваат и моден детал.
А. Н. С.
