Двајца поранешни припадници на војската на босанските Срби се уапсени денеска од полицијата по налог на Судот на БиХ, поради сомнеж дека учествувале во убиство на над 70 цивили од подрачјето на општина Кључ во 1992 година.
Тие се под истрага поради сомнеж дека на 1 јуни 1992 година учествувале во нападот врз селото Велагиќи, при што била заробена поголема група цивили, однесени пред зградата на основното училиште во селото, барале да се постројат и потоа пукале во нив.
Брутално биле убиени најмалку 78 цивили, чии тела потоа биле пренесени со камиони и закопани во масовна гробница, која е откриена и ексхумирана во 1996 година.
Двајцата уапсени се товарат дека извршиле кривично дело злосторство против човештвото.
Општината Кључ била под окупација на српски паравоени единици до септември 1995 година, кога е ослободена при заедничките акции кои ги спровеле Армијата на БиХ, ХВО и хрватската војска.
