Дополнителни извори на приходи во буџетот може да се обезбедат и од некои неефикасни државни компании и ресурси, преку јавно-приватни партнерства, концесии и слично, за што веќе имало интерес и се објавувало и пред кризата, рече премиерот Зоран Заев, посочувајќи ги државните Железници-Транспорт, Македонска пошта, Еурокомпозит, Тутунскиот комбинат-Прилеп, ресурсот Попова Шапка, Ливадиште, ТЕЦ Неготино.
-Тоа може да биде 100 отсто, може да биде јавно приватно партнерство, државата да остане еден дел, дури и под концесија да се даде итн. Тоа е досега неефикасен ресурс во рацете на државата и треба да се стави во функција, рече Заев.
Не се само приходите што би се добиле, туку доминантно, рече, заради тоа што се очекува да се зголемат и перформансите на нивното работење со влез на приватен капитал. Како пример ја посочи Македонска пошта која, посочи, не го држи трендот дури ни на регионот, а не на европските пошти.
-Заинтересирани имаме веќе од Австрија, Словенија, Романија, Чешка и сл. Имаме заинтересираност од земји на Вишеградската група да инвестираат во такви дејности. Но, имаме пример од познати компании од Швајцарија, Италија, Австрија за скијачки центри како што е Попова Шапка. Во Косово испорачавме понуда да влеземе заедно со Брезовица од нивна страна за да биде попримамлива. Генерално се позитивни и верувам дека можеби и заедно да одиме. Ливадиште во струшкиот дел е нешто што е навистина 100 отсто сопственост на ЕСМ, ама не го користиме како ресурс, рече премиерот.
Од нив, рече, може да се обзебедат и квалитетни приходи. Тие се чекаат и од продажбата на земјоделското земјиште. Анализата покажува дека земјоделското земјиште по пазарни цени што е во државна сопственост, рече Заев, вреди повеќе од две милијарди евра. Од тоа се очекувамат 200 до 300 милиони евра во 2021, 2022 и 2023 година.
Приходи се очекуваат и од внесување на кеш парите коишто се надвор од системот. Тоа значи дека се што не е кривично гонето или под истрага да може со плаќање на данок да се внесе во систем, додаде премиерот.
Дополнителна мерка е легализацијата на возилата со странски таблички. Проценката е дека тоа може да донесе помеѓу 20 и 40 милиони евра приход на државата.
Заев рече дека се отвораат и авангардни дебати за декриминализација и легализација на марихуаната, за проекти од енергетиката и штедење на енергијата
Најави и намалување на даночната евазија, која според ММФ е 37 отсто што значи дека се губат милијарда и 400 милиони евра кои можат да се внесат во буџетот.
