пишува: БРАНИСЛАВ ЃОРЃЕВСКИ
Во сенка на случувањата со Бугарија помина веста дека претседателот на Собранието, Талат Џафери поднесе измени и дополнувања на Деловникот за работа на Собранието со кои на пратениците кои се заболени од коронавирус или се наоѓаат во изолација, ќе им се овозможи да работат од далечина, односно онлајн да ги вршат своите работи.
Во ситуација кога вирусот е широко распространет, потребни се измени кои ќе овозможат функционалност на Собранието, но и заштита на здравјето како на пратениците, така и на вработените во собраниските служби. А предлог дополнувањата се токму во таа насока.
Прашањето не е само во имањето или немањето кворум за одржување седници како што сака тоа да го прикаже опозицијата, туку многу лесно може да се случи блокада на работните тела. На пример сите членови на одредена комисија да мора да бидат во задолжителна изолација поради контакт со заболено лице и тие иако не се заболени мора да останат во изолација, со што Комисијата би станала целосно нефункционална.
Со дополнувањата на Деловникот, пратениците кои се во изолација, како и оние заболени со полесна клиничка слика или се без симптоми, своите работни обврски би ги вршеле онлајн, од далечина, додека сите останати би биле во собраниските простории. Вакви искуства, од почетокот на пандемијата па до денес, има во многу земји во Европа и светот.
За жал и оваа прилика ВМРО-ДПМНЕ ја користи за на дело да ја покаже својата неодговорност и неконструктивност. Наместо поддршка на демократските процеси, поддршка за функционално собрание, тие ситуацијата ја (зло)употребуваат за теснопартиски цели и нова блокада на работата на Собранието.
Нивниот главен аргумент за противењето е членот 69 од Уставот кој вели дека седниците на Собранието се одржуваат со присуство на пратениците, но ниту во тој, ниту во кој било друг член не е прецизирано дека се мисли на физичко присуство.
Во време кога сите капацитети се ставени во борба против последиците од коронавирусот, неопходно е функционално собрание кое ќе носи одлуки во интерес на здравството, економијата, граѓаните.
Веќе утре почнува комисиската расправа за Буџетот за 2021 година, по што ќе следува и пленарна седница за негово усвојување. Ако ситуацијата со заболени пратеници ескалира, а опозицијата во Собранието продолжи со инаетот, многу лесно може да се случи Буџетот да не биде усвоен, со што ќе се нанесе сериозен удар врз и онака кревката економија.
Покрај Буџетот, пред пратениците се наоѓаат и низа клучни закони важни за интересите на граѓаните, важни за справување со коронавирусот и недозволиво е во таква ситуација Собранието да биде блокирано и да не носи одлуки.
Измените на Деловникот досега најчесто се носеле со консензус и така треба да биде и овој пат. Време е ВМРО-ДПМНЕ да покаже трунка одговорност пред институциите и пред граѓаните и да ги поддржи овие промени.
Затоа што на крајот, изборот е едноставен: Или Собранието ќе работи онлајн или системот ќе отиде офлајн.
Сите права се задржани. Текстот е личен став на авторот
