Постои ли реална причина ВМРО ДПМНЕ да се противи на обидот пратениците да продолжат со онлајн одржување на седниците?
Сите аргументи кои во јавноста ги нуди опозицијата не се сериозни или не се доволно силни, прво да ги уверат граѓаните, а потоа да го премислат владејачкото мнозинство во намерата преку онлајн седници да обезбедат поголемо присуство на пратениците, оти и тие не останаа имуни на Ковид 19.
Тоа дека пратениците немале компјутери дома е смешен и провокативен обид на ВМРО ДПМНЕ да не се соочи со реалната ситуација, како што избегнува соочување со здравствената криза и постојано наоѓа причини да не се вклучи во владините активности за справување со пандемијата, каква што би требала да биде една одговорна опозиција која мисли на јавното здравје.
Да замислиме една парламентарна седница онлајн. 120-те пратеници седнати дома пред лап топ со вклучена камера и аудио, сите собрани на една платформа која претходно ќе ја инсталираат и наместат стручни служби за да може непречено да функционира. Постои модератор/спикер кој ја води расправата и дава збор на сите пратеници кои се пријавиле затоа што таквата платформа има таква опција. Дополнително, седницата може да се снима. Гласањето може да се организира електронски или пак, ако постои некаков сомнеж кај некои пратенички групи, може да се одвива поединечно со изјаснување за или против. Освен што можеби побавно ќе се движи работата на парламентот, отколку во стандардните услови во сала, сепак не постои буквално ниту една причина да се оспорува онлајн одржувањето седници. Ниту еден пратеник нема да биде ускратен за дебата, ниту на еден пратеник нема да му пропадне гласот затоа што ќе гласа од далечина. Подобро парламентот да функционира побавно, отколку никако.
Покрај техничката можност за одржување онлајн седници со еднакво право на учевство во работата на сите пратеници, онлајн седниците претставуваат начин за заштита од ширење на корона вирусот. Со самото тоа што пратениците ќе работат од дома нема да имаат контакти, пред сè, меѓусебни, со што се намалува ризикот од пренесување на заразата. Дополнително, и оние пратеници кои во моментов се во изолација или се позитивни на Ковид 19, а не се хоспитализирани, ќе можат рамноправно да учевствуваат во собраниските активности. На овој начин може да се организираат и седниците на собраниските комисии и навистина да нема посериозен застој на парламентарните обврски.
И дали ВМРО ДПМНЕ навистина не ја сфаќа предноста на овој модел на одржување седници или глуми лудило?
Од една страна сите заштитени, од друга, парламентот непречено функционира. А непреченото функционирање значи и изгласување на Буџет за 2021 година, а во превод тоа значи пари за справување со здравствената и економската криза. Буџетот е на дневен ред деновиве. Секоја нормална опозиција би аргументирала на седница, онлајн, би дала предлози и конструктивно би учевствувала во расправата за на крајот сите да изгласаат буџет неопходен за спас од здравствено и економско пропаѓање на државата. Но, со ваквото однесување ВМРО ДПМНЕ првенствено покажува дека ќе прави опструкции само буџетот да не стигне на дневен ред. Сега се закануваат дека во иднина нема да обезбедуваат кворум за работа на владејачкото мнозинство, оти тоа само по себе нема мнозинство пратници за да одржува седници и да гласа.
На пример, сега за да се смени Деловникот за работа на парламентот, за да се воведе опцијата онлајн, неопходни се 61 глас, но власта нема толку пратеници затоа што неколкумина заради вирусот се спречени да присуствуваат на седници. Таквата ситуација сега ќе ја користи опозицијата, да нема кворум, да не се изгласаат измените во Деловникот, парламентот да остане да заседава со физичко присуство, власта да нема мнозинство, буџетот да остане неизгласан или одолговлекуван до последен момент на сметка на другите законски решенија кои периодов треба да се најдат на дневен ред.
Целата таа блокада на парламентот ќе влијае врз работата на сите институции, особено штетно ќе се одрази врз здравството, посебно кога се работи за пари. Таквата ситуација ВМРО ДПМНЕ ќе се обидува да ја престави како неспособност на владејачкото мнозинство и како пораз на власта во битката со пандемијата.
А реалноста е поинаква.
ВМРО ДПМНЕ со блокадите го парализира системот за потоа да обвини друг. Ова е далеку поизвесна теорија која би се криела зад обидот на ВМРО ДПМНЕ да нема онлајн седници, а не нивните изговори кои се далеку од памет.
Д. Е.
