Министерот за внатрешни работи, Оливер Спасовски, во вестите на Сител телевизија зборуваше и за опцијата за воведување полициски час, мерка која, според него, ќе се воведе само ако расте и понатаму бројот на инфицирани, а при тоа граѓаните не се придржуваат до мерките за заштита. Ако сите ги почитуваме препораките на лекарите тогаш нема да има потреба од ригорозната мерка.
„Сите одлуки на владата за заштита на здравјето се според предлозите на Комисијата за заразни болести и нивните анализи. До сега немаме предлог за полициски час, затворање на државата, затворање на викендите… А дали е опција за во наредниот период? Да, постои опција, но мерките за заштита мора да бидат димензионирани според определената ситуација. Според оние анализи во Комисијата, овие мерки кои ги имаме даваат одредени ефекти, се намалува преносот на вирусот, и тоа ќе се почувствува повеќе во наредните денови. Ако бројот на заболени расте, ќе имаме и порестриктивни мерки, иако никој не го сака тоа. Едно да се знае, владата е тука да направи се за да се заштити животот и здравјето на граѓаните.“- увери Спасовски и испрати апел до граѓаните да продолжат со доследно почитување на мерките.
Тој извести дека Акцискиот план во време на кризна состојба е донесен и во него е прецизирано која институција, со колкави ресурси и на каков начин ќе биде ангажирана.
