Коронавирусот навлезе во сите пори на општеството, па не е исклучена и културата. Најголем доказ за тоа се статистиките за бројот на претстави, концерти и приредби и бројот на посетителите.
Во периодот 2019/2020 година вкупниот број на прикажани претстави во професионалните театри е намален за 40,6 %, додека бројот на посетителите е намален за 39,4 % во споредба со периодот 2018/2019 година, соопшти Државниот завод за статистика, додавајќи дека просечниот број на посетителите на една претстава изнесува 221.
– Во периодот 2019/2020 година, во однос на периодот 2018/2019 година, бројот на прикажаните претстави во професионалните театри за деца и млади е намален за 40,3 %, исто така и бројот на посетителите е намален за 36,7 %. Бројот на прикажаните претстави во аматерските театри е намален за 85,1 %, исто така и вкупниот број на посетителите е намален за 86,5 % – стои во соопштението.
Од Државниот завод за статистика забележале дека во периодот 2019/2020 година, во однос на периодот 2018/2019 година, бројот на концертите е зголемен, додека бројот на посетителите на Филхармонијата е намален. Кај професионалниот ансамбл на народни игри и песни, во периодот 2019/2020 година, во споредба со 2018/2019 година, е забележано намалување на бројот на самостојните приредби (концерти) и бројот на посетителите.
