Државната изборна комисија (ДИК) по службена должност денеска го поништи гласањето на изборите за градоначалник во избирачкото место 2266 во Штип, поради тоа што во гласачката кутија имало едно ливче повеќе од потписи во изводот од Избирачкиот список.
Членовите на Комисијата ги преброаја гласачките ливчиња и утврдија дека навистина има едно ливче повеќе. ОИК и ИО ја утврдиле фактичката состојба.
Членовите на ДИК не го прифатија предлогот на Елизабета Постоловска, член на ДИК, за разрешување на Избирачкиот одбор и на Општинската изборна комисија поради вишок ливче во ИО 2266.
Јанакие Витановски оцени дека гласањето не влијае на резултатите од гласањето во Штип и дека ОИК и ИО ги имаат преземено сите дејствија.
Постоловска исто така имаше забелешка и за семејно гласање на едно гласачко место во Штип и намерно прикривање од страна на ОИК Штип. Иако бил побаран записникот за настанот, до денеска не бил доставен до ДИК.
ДИК на седницата го прифати Правилникот за критериумите за определување на надоместок за членовите на иборните органи и изборната администрација, само што овој пат средствата треба да бидат исплатени од локалната самоуправа.
