Криејќи се позади наводни објави од социјалните мрежи некои портали што најчесто се хранат со невистини и дезинформации, безмалку секогаш се обидуваат да протнат лажни вести. Во оваа лажна вест, новост е тоа што истата форографија се пласира како поткрепа за лажна вест по втор пат точно после една година.
Станува збор за фотографија од санитарни простории во училиште, која на порталот Експрес.мк се прикажува како сегашна, a всушност се работи за стара фотографија, која комплетно не содејствува со сегашната состојба. Всушност, фотографијата и првиот пат кога беше злоупотребена како лажна вест, не ја прикажуваше фактичката состојба.
Конкретно за оваа фотографија, пред точно една година Фронтлајн по пријава на граѓанка од Јегуновце разобличи лажна вест (наслов на веста: Тоалетите во училиштето во Јегуновце се реновираат, а не се рушевини). Станува збор за тоалетите во училиштето „Александар Здравковски“ во Јегуновце.
На повеќе интернет медиуми, тогаш се појавија содржини во кои се „известуваше“ дека учениците од основното училиште во село Јегуновце, Тетовско, нема каде да измијат раце, во сезона на инфекции и грипови.
Градоначалникот Дарко Блажевски, на 24.1.2020 година за Фронтлајн изјави дека тоалетите биле руинирани, иако училиштето било реновирано во 2008 година. Појасни дека дури и советниците од ВМРО-ДПМНЕ во општината гласале за реновирање, а откако завршил тендерот, веднаш се почнало со градежните работи. Ова се фотографии од реновираните тоалети испратени до нашата редакција од страна на училиштето на 28.1.2020 година (наслов на текстот: Заличија тоалетите во училиштето во Јегуновце), од кои може да се забележи дека тоалетите се реновирани.
Она што најмногу интригира, е дека после точно една година, на ист датум, истата фотографија повторно се пласира како лажна вест. Разликата е само во текстот кој е со изменета конотација. Тогаш, на 23.1.2020 година веста која беше пласирана од порталите беше намената за предвремените парламнетарни избори (очигледно да се оцрни работата на Општината и раководството на училиштето), а денес како што пишуваат во насловот на текстот „Реформи требаат зарем не?“ е очигледно наменета за деградирање на најавените реформи во образованието од страна на МОН.
Колкава е веројатноста „случајно“ да се пласира лажна вест на ист датум во различна година, навистина е многу интересно прашање.
Ј. Ѓорѓиоски
