На социјалните мрежи и во дел од медиумите се прошири лажната вест дека ќе се воведува сексуално образование во нижите одделенија на основното образование. Без проверка на фактите и официјалните извори, на социјалните мрежи настана бура од негативни коментари и говор на омразата против Министерката за образование, Мила Царовска, но и кон експерти и граѓански активисти.
Лажната вест тргна од Фејбук страната „Од нас за нас“ на која често се појавуваат дезинформации и лажни вести, а администраторите не ја почитуваат обврската да ја модерираат дискусијата и да го спречат говорот на омразата. Објавата има преку 140 коментари и споделена е повеќе од 260 пати. Објавата веднаш ја презедоа дел од медиумите блиски до опозицијата кои секојдневно објавуваат вакви и слични содржини.
Се работи за манипулирање со јавноста со дезинформации насочени против реформскиот процес во образовниот систем. Со демант се јави и Министерката за образование и наука:
Категорично ги демантирам невистините проширени од ФБ групата „Од нас за нас“ на социјалните медиуми, а пренесени од дел од порталите, за наводни содржини во учебници за второ одделение за изучување на сексуалното образование. Веста е целосно лажна, а користените илустрации воопшто не се дел од учебници и материјали од нашиот образовен систем. Ги повикувам граѓаните, родителите и учениците да не подлегнуваат на непроверени информации коишто се шират на социјалните медиуми, затоа што со истите се нанесува директна штета на Министерството за образование и наука, како и на целиот образовен систем.
Прикажаните текстови и илустрации кои се прилепуваат на делови од Концепцијата не се извадени од наставни материјали предвидени за нашата земја. Барам одговорност за лажните вести кои се тенденциозни, со намера да шират паника и да ја манипулираат јавноста, а за постигање на цели кои немаат никаква допирна точка со унапредување на образованието.
Останува да се види дали некој ќе има доблест да ги објави демантите на овие лажни вести, а секако и дали институциите ќе преземат законски мерки за санкционирање на неодговорното објавување дезинформации и поттикнување говор на омразата.
Д. Е.
