На седум локации во центарот на Кочани наскоро ќе бидат поставени подземни контејнери. Општина Кочани и Комуналното јавно претпријатие „Водовод“ почнуваат со замена на постојното соподземно складирање на отпадот, кој ќе се селектира. Јавната набавка се спроведува и во двете институции.
Според стручните служби, подземните контејнери заштедуваат простор, го подобруваат изгледот на околината и овозможуваат селектирање коешто е многу важно за натамошниот третман на отпадот. На површината е видлива стандарната, дизајнирана корпа за собирање на отпадот. Секој подземен контејнер ќе биде поставен на платформа и под површината ќе содржи четири единици, од кои две за комунален отпад и по една за хартија и за пластика. На тој начин се избегнува непријатната миризба, расфрлањето на отпадот, поместувањето и оштетувањето на контејнерите. Од друга страна, тие ќе го оневозможат фрлањето градежен шут, отпад од големи пакувања и друг кабаст материјал. Со подземното складирање на отпадотќе се создаде почиста и поздрава средина.
Со јавната набавка се бараат подземни контејнери чие празнење ќе се врши со истите транспортни средства на КЈП „Водовод“, на кои ќе биде вградена хидраулична инсталација.
Подземното складирање на отпадот најпрвин ќе почне да се применува кај станбените објекти за колективно домување, во двата блока на Трговскиот центар, Стришани и кај новиот станбен комплекс на „Стево Теодосиевски“.
