Синоќа, роверот „Perseverance“ на американската вселенска агенција успешно слета на Марс.
Роботот на НАСА неколку години ќе остане на површината на оваа планета и ќе дупчи во почвата за да испита дали има знаци на живот. Тоа ќе го прави со помош на голема дупчалка во вид на роботска рака, која е креација на тимот предводен од Колумбијката Дијана Трухило.
Небото дефинитивно не е граница за 41-годишната инженерка, која има инспиративна животна приказна. Дијана е родена во Колумбија, земја каде што имало многу насилство, па ѕвездите и небото биле нејзино безбедно место и таа често ги набљудувала.
На 17-годишна возраст, ги спакувала куферите и без да зборува англиски јазик, со само 300 долари на свое име, се преселила во САД. Во „земјата на можностите“, Дијана чистела домови за да ги плати своите студии и да го оствари својот „американски сон“.
Трухило била првата хиспаноамериканска имигрантка примена на Академијата на НАСА, а во 2008 година, таа станала и дел од НАСА.
„Порано чистев куќи, а денес се обидувам да откријам дали има живот на друга планета. Дојдов во САД без да знам англиски јазик со само 300 долари на мое име, а денес ја водам НАСА на Марс“ – вели Дијана.
На секоја млада девојка која сака да ги следи нејзините чекори, таа ѝ порачува:
„Би ѝ рекла да седне во изолиран дел од нејзиниот дом и да размисли што навистина сака. Не се колебај, верувај во себе. Запиши ги твоите вештини. Што е она што сакаш да го правиш? Потоа започни да создаваш план. Откриј кои се луѓето што го постигнале она што ти сакаш да го постигнеш. Откриј како го направиле тоа за да откриеш како да управуваш на твојот пат. Потоа, стави го ова во временска рамка. Сите овие нешта ќе ти помогнат да останеш на правилната патека и ќе те држат на шините“.
извор: http://www.femina.mk/
