Кога на еден оглас што ќе го објави Агенцијата за вработување ќе се јават пет кандидати од различна етничка припадност, тогаш при изборот на кандидатите кои ги исполнуваат условите треба да биде отсликана сликата на нашето општество во делот на етничката припадност на кандидатите. Кога тие еднакво ги исполнуваат условите ќе се гледа да бидат застапени на ист принцип како што се застапени во општеството што е правично, појасни денеска министерката за труд и социјална политика Јагода Шахпаска.
Тоа, како што посочи, значи инклузија, рамноправност, диверзитет, разновидност на лицата кои ќе бидат вклучени зашто сите кои аплицираат за мерките од Оперативниот план влегуваат во ранливата категорија на граѓани која првично ги регрутира во системот за да бидат вклучени во Оперативниот план на програми и мерки.
Како што истакна, диверзитетот треба да биде отсликан за сите мерки од Оперативниот план како за корисниците на мерките, така и за фирмите кои аплицираат.
-Ако аплицираат компании чии сопственици се со различна етничка припадност, тогаш и во изборот на компаниите кои ќе бидат корисници на мерката како приматели на субвенција кои ќе вработуваат ранливи лица исто ќе бидат отсликани во сликата на општеството, рече Шахпаска во одговор на новинарско прашање при денешната презентација на Оперативниот план за активни програми и мерки 2021 година.
При изборот на кандидати кои аплицирале за некоја мерка, потенцира, треба да ја пресликаме сликата на нашето општество, односно треба да се запази диверзитетот по возраст, пол, верска и етничка припадност на ранливите категории граѓани.
-Воедно и при аплицирањето за мерките од Оперативниот план за компаниите кои ги исполнуваат критериумите ќе се води сметка да биде отсликано нашето општество, диверзитетот, различностите. Меѓутоа, основен критериум по кој што ќе влегуваат невработените лица е нивната ранливост независно од која етничка припадност се, појасни Шахпаска.
Нагласи дека строго се дефинирани критериумите за вработување и додаде дека кога има кандидати со исти квалификации тогаш се гледа застапеноста да биде онаква каква што е во општеството.
извор: МИА
