Динамиката и прогресот од досегашната соработка помеѓу МВР и Делегацијата на Европската Унија, во делот на спроведувањето на проектите финансирани преку Инструментот за претпристапна помош (ИПА), меѓу кои имплементација на системот за опоравување од катастрофи и обезбедување на континуитет со работата и модернизација на ИТ инфраструктурата во седиштето на МВР, воспоставување на нов Прифатен центар за странци, изградба на нова зграда за Одделот за криминалистичко-технички испитувања и вештачења и нејзина акредитација согласно ISO 17025 стандардот, усогласување на националните системи со ЕУ и Шенген барањата во областа на граничното управување и друго, биле темите на кои разговарале министерот за внатрешни работи Оливер Спасовски, заедно со државниот секретар Магдалена Несторовска, на денешниот работен состанок со претставници на Делегацијата на Европската Унија, предводени од раководителот на Одделот за соработка, Никола Бертолини.
Бертолини, како што соопштија од МВР, изразил задоволство од постигнатото во рамки на проектите што во моментот се спроведуваат во Министерството, а Спасовски во име на МВР изразил благодарност на Делегацијата на ЕУ за досегашната поддршка, истакнувајќи дека таа е од исклучителна важност за Министерството, поради што на располагање се сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
Спасовски и Бертолини, стои во соопштението, изразиле подготвеност со целосна посветеност да се продолжи со спроведување на активностите во рамки на проектите кои во моментот се спроведуваат, како дел од ИПА програмата во рамките на МВР, како и уверување за продолжување на одличната соработка и во иднина.
извор: МИА
