Десет македонски компании, ко – изложувачи на националниот павиљон на Агенцијата за странски инвестиции и промоција на извозот се претставуваат на годинешново дигитално издание на Хановер Месе. Поради ситуацијата предизвикана од коронавирусот светски водечкиот саем за технологија се одржува во дигитална форма од 12 до 16 април под мотото „Целиот технолошки свет доаѓа во Хановер“.
На саемот, информираат од Агенцијата за странски инвестиции, компаниите имаат можност за оnline закажување на состаноци, учество на Б2Б средби, поврзување со контакти, споделување дигитални презентации, live stream и учество на форуми на разни теми од областа на технологијата.
-Дигиталното издание на саемот е организирано на начин што секоја компанија – изложувач има свој профил на кој ќе споделуваат информации за компанијата, фотографии од производи и услуги кои ги нудат и видео презентации, велат од Агенцијата.
Од Агенцијата, додаваат, преку програмата за поддршка на извозот ги поддржува компаниите во нивните активности за зголемување на извозот и освојување нови пазари, а Hannover Messe е еден од саемите каде Invest North Macedonia е присутна. Оваа година во рамките на националниот павиљон изложувачи се следниве македонски компании: Ламинати, Еуроедил, ИТ Иновате, ЕМОС, Братство, Свемек, Металкат, Техно Гума, Завар и Универзал.
извор: МИА
