На денешен ден, 5 мај во далечната 1945 година, усвоена е македонската азбука. Овој датум познат како Денот на македонскиот јазик ја претставува симболиката на создавањето на нашиот мајчин јазик пред цели 76 години, кога со решение на Президиумот на АСНОМ пристапено е кон усвојување на азбуката на македонскиот јазик како негово официјално писмо.
Времето во кое живееме е и време во кое македонскиот јазик се соочува со неосновани проблематизирања и оспорувања. Но, ако се вратиме назад, ќе видиме дека македонскиот јазик е тој кој ги помина сите нужни фази на создавање и кодификација, на пробив и препознавање, за денес биде тоа што е – службен јазик на македонската држава.
Најдобрите аргументи за посебноста на македонскиот јазик можеби лежат во неговите уникатности, како што се буквите „ѕ“ и „ќ“, основањето на глаголскиот прилог со „-јќи“ и други специфики. Кодификаторот на македонскиот јазик, Блаже Конески, денес сосема заслужено стои како име на Филолошкиот факултет при нашиот најстар универзитет – УКИМ, ама славењето на неговите дела и творби, заслужуваат и многу повеќе. Ова особено во ерата на дигиталното општество во кое живееме, кога напливот од интернационализми е огромен, а афирмацијата на сопственото јазичко богатство е и повеќе од потребно.
Во таа насока, денешната промоција на електронското издание на толковниот речник на македонскиот јазик и овозможувањето дигитално пребарување низ оваа алатка, претставуваат силен чекор и испраќање јасна порака за заштитата на сопствениот јазик. Различноста на македонскиот јазик во словенскиот свет и неговата изворност во светските семејства на јазици се покажани и докажани преку историското научно остварување кое потврдува дека Македонците се народ со богата лексика, традиција и наследство, кои не се среќаваат на друго место.
Обележувајќи го овој ден, не смееме да заборавиме дека говорењето на мајчин јазик претставува и човеково право, а неговата заштита е должност и на државата и на самите граѓани. Да го негуваме и браниме сопствениот јазик, да ги почитуваме и јазиците на другите и да докажеме дека обединети заслужено припаѓаме на европскиот континент, географски, вредносно и јазично.
И. Дургутов
