Не навредувај различности туку почитувај е темата на која ученици од Гостивар и Тетово од различни националности ќе изработуваат уметничи творби во рамки на превентивно – едукативниот проект „Стоп на говорот на омраза“, чиј носител е отсекот за превенција при СВР Тетово, а кој четврта година по ред се спроведува во средните училишта во Тетово и Гостивар.
„Со овој проект во изминативе четири години беа опфатени 3000 ученици од повеќе средни училишта, но истиот извесно време паузираше поради корона кризата и ете сега ќе се заокружи со планираните содржини. На педесетина ученици и на нивните ментори вчера и денеска им беа поделени сликарски материјали, со кои тие дома ќе изработуваат уметнички творби со тема „Не навредувај различности туку почитувај“, рече Марјан Јосифоски портпарол на СВР Тетово.
Делата кои ќе бидат изработени на крајот од месецот ќе бидат изложени во Тетово и Гостивар, со порака во нив цврсто да му се застане на говорот на омраза, за жал неретко присутен во социјалните мрежи, а во кои се инволвираат и млади средношколци од овие простори.
Целта на проектот е да се потикнат и охрабрат младите да ги почитуваат различните ставови, мислења, припадност ориентација и други специфики и не само тоа, туку во прв план да ги извлечат вистинските вредности меѓу младите. Да се намалат насилните постапки од претходно споделен говор на омраза, најчесто споделен на социјалните мрежи.
Од СВР Тетово, велат дека изминативе четири години додека се спроведува проектот, е увидено дека истиот дава позитивни резултати.
