Главната уредничка на независниот белоруски медиум TUT.BY, Марина Золотова е обвинета за затајување данок, соопшти медиумот, наведувајќи дека тоа е измислица во рамките на репресивната акција против медиумите, пренесе МИА.
„На Золотова и се заканува затвор од три до седум години доколку биде прогласена за виновна по сослушувањето зад затворени врати“, соопшти TUT.BY.
Золотова е „обвинета за соучесништво во затајување данок од особено големи размери“, а властите досега не ги коментираа овие обвинувања.
Во TUT.BY беа уапсени 15 вработени во рамки на акцијата против масовните протести против претседателот Александар Лукашенко што избувнаа минатата година по спорните избори.
За време на протестите, TUT.BY беше една од најчитаните веб-страници во Белорусија.
Белоруските власти ја одзедоа акредитацијата на многу новински организации.
Како што пренесуваат странските агенции, новинари наклонети на опозицијата се соочиле со рации, апсења, затвор или биле принудени да се преселат во странство.
