пишува: БОРЧЕ БОКИ ТРАЈКОВСКИ
Скопје од секогаш бил главен град на Македонија, ама никогаш не бил град само на Македонците, на оние со национално верска определеност како Македонци христијани. Во Скопје отсекогаш живееле, се раѓале, растеле луѓе од речиси сите вери и нации на овие простори. И Турци, и Срби, и Албанци, и Бошњаци, и Власи, и Роми, и Торбеши, и Грци, и Бугари. Скопје отсекогаш бил симбол на национални и верски различности, во кој се споделувала само скопскоста, и на тој начин ќе продолжи да се развива во иднина.
Никој, драга Јелена Жугиќ, од 1944 до денес, не го окупирал Скопје за да го освои, за национално односно верски да надвладее, за да наметне свои правила и принципи врз останатите кои се во малцинство, за да администрира врз база на националистички основи. Скопје отсекогаш ги отворал портите за секој добронамерник, и никогаш не поставувал ограничувања од каков било вид, освен, од барањето почит кон градот, кон неговите традиции преку кои ја пренесува скопскоста, цивилизираноста, градскоста. Скопје е слика и прилика за мултиетничка средина со векови наназад, град кој со секое свое однесување наметнува почит кон различните и по вера и по нација…
Го преслушав тонскиот запис од твое обраќање, некаде, претпоставувам на некоја трибина каде ја започнуваш твојата кампања за градоначалничка на Скопје, и морам веднаш да ти кажам дека, не само што се самоубиваш, туку, со ваквите националистички реторики, настапи, од типот, „Бутел го окупираат Албанците“, па, „го изгубивме Чаир, ќе го изгубиме и Бутел“, длабоко се самозакопаваш без шанса да воскреснеш некогаш, да се појавиш од пепелта како Феникс.
Не, Жугиќка, ти не си скопјанка, ниту некогаш си била. Ти не само што не го познаваш твојот можеби роден град, ти, Јелена, благе везе немаш што зборуваш, пардон, што баљезгаш. Тоа, што можеби сите скопјани не треба да го дозволат, е нападот на Скопје од вакви националистички души, шовинисти и фашисти, кои, најголемото богатство на Скопје, мултиетничноста, различните вери, соживотот и градскоста, ја користат како лоша појава, како окупација, како цртање граници, во кампања за прв човек на Скопје…
Јелена Жугиќ, најголемата штета за Скопје сте вие од ДПМНЕ, исто како и за Македонија, затоа што, и Македонија и Скопје највеќе страдаат од окупацијата на „сељачизмот“, лажниот патриотизам, и екстремен национализам. Ти, со ваквата реторика, си најголемата опасност за Скопје. Живеам во Бутел речиси 60 години, живеам со Албанци, Бошњаци, Турци, Македонци, Срби, Торбеши, Роми, од ниту еден од нив не сум загрозен, како од концентрацијата на национализмот кој го шират ваквите како тебе, ДПМНЕ-овци…
Скопје е музика, поезија, љубов, звук на камбани и пеења од минариња, Скопје е мирис на липи и анамска рака, на јорговани и багреми…
Ќе ти речев да се засрамиш, ама ти не си права скопјанка за да допре до тебе таква порака, па го прашав Пајо да ми каже што да ти речам. Ми рече: Батали ја Боки…