Само што заврши уште една учебна година и во Тетово повторно се појавија старите шеми на изнудување пари од ученици и родители од основните и средни училишта во Тетово. Многу ученици и родители изминативе денови пријавија дека од нив е побарано пари за сведителствата, обвинуваат од Алијанса за Албанците (АА) на денешната прес-конференција во Тетово.
– Знаејќи дека законот на сила и последното соопштение од Министерството за образование и наука (МОН) велат дека документацијата на завршната година се обезбедува од Бирото за образование, ние како Алијанса јавно прашуваме: Кој ги ограбува тетовските ученици и нивните родители? Од кој центар доаѓаат наредбите за да им се земат пари повторно?, прашуваат од АА.
„Нам ни е јасно дека жртви на овие шеми се и тетовските учители, наставници и професори кои што некој ги става во тешка положба и пред сè бараме разбирање за нив, што и така се прегазени од неисплаќањето за додатната работа за време на пандемијата.
Но, жртви се и учениците и родителите на Тетово, кои по многу трошоци за обезбедување компјутерска опрема, телефони и интернет, сега се принудени да плаќаат и за сведителства.
Ги повикуваме корумпираните директори од корумпираната владејачка партија ДУИ и назначени од најнеуспешната градоначалничка во историјата на Тетово, Теута Арифи, итно да престанат со оваа ниска форма на корупција и злоупотреба.
Ги предупредуваме овие службени лица ако од денес дознаеме за уште еден случај од оваа појава, нема да се двоумиме да ги објавиме со име, презиме и слики сите тие што ги ограбуваат нашите фамилии и вршат притисок врз наставниците.
Јавно го повикуваме инспекторатот за образование барем еднаш правилно да ја изврши својата должност и да ги казни тие што немаат милост ни кон децата.
Сведителствата со закон се обезбедени бесплатно, затоа драги деца, родители и почитувани наставници: Немојте да молчите, пријавете секој обид за кражба, грабеж и корупција во Тетово, за да се бориме заедно против овие појави, на кои наскоро, во октомври оваа година и официјално ќе им дојде крајот! Во оваа борба Алијанса за Албанците ќе биде секогаш на ваша страна, против криминалот, корупцијата, кражбата и грабежот во сите нејзини форми.“, велат од Алијанса за Албанците.
