Ја започнавме средбата со премиерот на Бугарија, Стефан Јанев. Денес работиме на зајакнување на довербата и преку искрен пристап целиме да постигнеме исчекор напред кон решение, објави на Твитер Премиерот Заев.
Зоран Заев, во рамките на агендата на денешната работна посета на Република Бугарија, претходно се сретна со лидерот на ГЕРБ Бојко Борисов и со претседателката на Бугарската социјалистичка партија (БСП) Корнелија Нинова.
На средбата со Боприсов, беше изразена желбата, врз основа на претходните позитивни искуства од подготовката и потпишувањето на Договорот за пријателство и добрососедство и врз основа на лидерството на Бугарија во однос на проширувањето на ЕУ кога претседаваше со Советот на Европската Унија, со нова динамика да продолжи поддршката на евроинтеграциските процеси на Северна Македонија и на Западен Балкан.
За време на разговорот беше речено дека службената влада на Република Бугарија ја има целата надлежност и уставна можност да решава актуелни отворени прашања.
На средбата со Нинова, на која учествуваше и заменик претседателот на Владата задолжен за европски прашања Никола Димитров, премиерот Заев и претседателката на БСП Нинова се согласија дека преговорите на Северна Македонија со Европската Унија мора да почнат час поскоро и дека секоја поддршка во оваа насока е од исклучителна важност.
Ј. Ѓ.
