Со панахида во црквата „Успение на Пресвета Богородица“ во штипско Ново Село и полагање на цвеќе пред споменикот денеска беше одбележана 101 годишнината од убиството на на контроверзниот историски лик Тодор Александров. Според претседателот на патриотскиот институт при ВМРО ДПМНЕ, Александар Пандов Александров е еден од главните столбови за формирање на современата македонска држава.
-За мене како Македонец, историчар и политичар, токму Тодор Александров е еден од славните македонски синови на кои им должиме тоа што ние сега ја имаме Република Македонија како држава, изјави Пандов.
– На секој еден му е јасно дека тој е Македонец, роден во Штип, во Ново Село, работел и дејствувал како Македонец, работел за македонската кауза, идејата за автономна и суверена Македонија била негова мисла водилка, додаде Пандов.
Панахидата за Алаксандров годинава се одржа по 30-ти јубилеен пат, а од страна на градоначалникот на Општина Штип, Иван Јорданов, пратеникот во македонското Собрание, Душко Иванов, делегации од патриотски здруженија во земјава беа положени букети цвеќе на споменикот на Тодор Александров, кој минатата година се откри во Ново Село, спроти музејот на ВМРО.
