На покана на Архивскиот комитет на НАТО, директорот на Државниот архив Емил Крстески и Светлана Успрцова, раководител на сектор за истражување, меѓународна и домашна соработка и публикување на архивски материјал, првпат официјално учествуваа на состанок на Архивскиот комитет на НАТО.
На состанокот учествувале околу 60 историчари кои, пред сѐ, се занимаваат со воена историја и архивисти од националните архиви на Велика Британија, Франција, Германија, Канада, Соединетите Американски Држави, Холандија, Хрватска, Босна и Херцеговина, Република Северна Македонија и други.
– Овој состанок е значаен поради тоа што претставува прв чекор на соработка на Државниот архив со Архивскиот комитет на НАТО, откако на 27 март минатата година, нашата земја стана полноправен член на НАТО-алијансата, истакнаа од Државниот архив.
Крстески во своето обраќање во првиот дел од состанокот се осврнал на значењето на документите од Архивот на НАТО за историјата на нашата држава и за историчарите кои се занимаваат со современа историја и дал приказ за документите поврзани со НАТО, кои се наоѓаат во нашиот Архив. Тој дал и иницијатива за објавување на брошура која што ќе ги содржи сите значајни документи поврзани со патот на нашето зачленување во Алијансата.
Успрцова спровела презентација на тема: „Пристапот до архивските материјали во Државниот архив, потрагата по нови архивски материјали и архивски фондови поврзани со НАТО“.
На состанокот се разговарало за видовите на архивските документи од активностите на НАТО, кои се, пред сѐ, оперативни или воени дневници, за потребата од нивно декласифицирање и достапност до јавноста после одреден временски период, како и за архивските фондови на НАТО, поврзани со операциите во Босна и Херцеговина (IFOR и SFOR).
