Помошник-државниот секретар на САД задолжен за Европа и Евроазија, Филип Рикер вечерва за телевизија „Сител“ изјави дека мора да стартуваат преговорите за Северна Македонија со Европската унија затоа што земјава и географски и политички е дел од Европа.
– Пред една година, ЕУ потврди дека Северна Македонија и Албанија треба да почнат преговори за членство. Тоа се уште е нивен став, но очигледно има препрека за што ние сме многу разочарани и таа мора да биде надмината. Имам целосна доверба дека ќе биде, бидејќи Северна Македонија е европска земја, рече Рикер.
Оцени дека земјава е на вистинската патека и оти треба да се фокусира на реформите додавајќи дека САД останува нејзин сојузник. Додаде дека регионот е полн со историја, но оти најважно е да се користи историјата за да се формира иднинатата.
– Она што го научивме од историјата е дека не можеме да ја промениме историјата, може да ја промениме иднината. Но, исто така не можеме да ја промениме и географијата. Сакаме да го видиме овој дел од Европа уште посилен, попросперитет и побезбеден. Јас сум уверен дека тоа така и ќе биде, рече Рикер.
Договорот од Преспа, според него, е исклучителен документ и пример за модерна дипломатија.
– Договорот од Преспа беше визионерски, храбар дипломатски напор за кој беше потребно вистинско лидерство и тоа е нешто за кое САД многу се гордеат. Ние се обидовме да ја одиграме нашата улога, да охрабриме и да помогнеме во тој процес, кој беше предводен од Северна Македонија и Грција и вашите лидери, истакна Рикер во вечерашното гостување на телевизија Сител.
