Претседателот на Собранието, Талат Џафери денеска оствари средба со Бенедето Дела Ведова, заменик-министер за надворешни работи на Италија, кој престојува во официјална посета на земјава.
Претседателот Џафери изрази задоволство што билатералните односи меѓу Република Северна Македонија и Италијанската Република се традиционално добри и пријателски, а економската соработка го одржува оптималниот тренд.
Како што соопштија од собранискиот Сектор за односи со јавноста, Џафери истакна дека особен акцент ставаме на интересот за продлабочување на севкупната соработка меѓу двата парламента, јакнење на односите меѓу Северна Македонија и Италија рамноправни сојузници во НАТО, како и меѓу нашите две делегации во рамките на Парламентарното собрание на Алијансата.
– Особено се цени конструктивната соработка и во рамките на Јадранско- јонската иницијатива и Централно европската иницијатива, каде Италијаската Република има клучна и активна улога и дава силен придонес кон јакнењето на меѓусебните релации на земјите членки, изјави претседателот на Собранието и се заблагодари на постојната поддршка на италијанскиот Парламент, кој со резолуциите што ги донесува дава искрена и недвосмислена поддршка на нашите евроинтеграции.
Дела Ведова изрази задоволство од традиционално добрата билатерална соработка која нема отворени прашања, добрите релации меѓу двата парламента, а посебно се осврна на интензивните активности на италијанските институции во рамки на ЕУ да обезбедат почеток на преговорите за Северна Македонија и Албанија.
– Информираше дека ставот на италијанската Влада е што поскоро отворање на преговарачката рамка, а отворените билатерални прашања да немаат влијание врз процесот на евроинтеграција и за италијанскиот предлог во идните дискусии во конференциите за „Иднината на Европа” задолжително да се вклучат младинските политики, односно гласот на младите, и тоа не само од земјите членки на ЕУ, туку и од земјите од Западен Балкан. Се заложи за посилна трговска соработка меѓу двете држави, како и посилен продор на италијанските инвестиции во Република Северна Македонија, особено во сферата на патната инфраструктура и енергетиката, стои во соопштението од собранискиот Сектор за односи со јавноста.
Соговорниците, се посочува во соопштението, споделија и заеднички видувања околу трендот на намалување на кредибилитетот на ЕУ на овие простори доколку се продолжи со забавеното темпо на евроитеграција на земјите од Западен Балкан, потоа стравот од можни несакани влијанија на трети земји, како и јакнење на евроскептицизмот.
Тие ја реафирмираа важноста од континуиран политички дијалог во насока на јакнење на севкупната билатерална соработка меѓу двете држави.
– Беа искажани заложби за особено унапредување на меѓупарламентарната соработка и споделување на заедничките искуства од надворешната политика и парламентарната дипломатија, се додава во соопштението.
извор: МИА
