Зајакнување и унапредување на економската соработка помеѓу РС Македонија и Грција, беше договорено на денешната средба во Скопје меѓу вицепремиерот за економски прашања Фатмир Битиќи и министерот за финансии Фатмир Бесими со заменик-министерот за економска дипломатија на Грција, Костас Фрагогианис.
Двете страни се согласија да работат на зголемување на трговската размена, зголемување на инвестициите како и потпишување договори коишто ќе ги подобрат позициите на фирмите, информираат од Министерството за финансии.
-На средбата беше истакнато дека во услови на пандемија клучно е зголемување на економската соработка со соседните земји, како и преземање заеднички чекори коишто ќе имаат импакт врз создавање услови за забрзан раст на економијата. Соработката и пријателството меѓу двете земји се зајакнуваат. Се работи на проекти кои се од капитална вредност за двете држави кои ќе донесат квалитет на животот за нашите граѓани кои го заслужуваат, велат од кабинетот на Бесими.
Инаку, трговската размена со Грција годинава бележи раст од 25,4 проценти во однос на минатата година. Годинава во периодот од јануари до јуни трговската размена достигна близу 400 милиони евра.
Додека странските директни инвестиции од 2017 година до сега изнесуваат 89,6 милиони евра.
-На средбата се дискутираше и за тековните и идни проекти. Како еден од позначајните проекти беше истакнат проектот за изградба на интерконективниот гасовод од Неготино до границата со Грција, инвестиција која чини 58 милиони евра. Европската инвестициска банка и Европската банка за обнова и развој изразија интерес за доделување заеми со државна гаранција за финансирање на овој проект. Одборот на директори на Европската инвестициска банка во јули 2021 година одобри финансиски средства во износ од 29 милиони евра за реализација на овој проект, иформираат од Министерството за финансии.
Оттаму соопштуваат дека од ВБИФ се добиени грант средствата за инвестиции во износ од 9,9 милиони евра кои ќе бидат наменети за финансирање на градежните работи и грант средства во износ од 2,7 милиони евра ќе бидат наменети за техничка помош при имплементација на проектот (надзор, управување со проектот), подобрување на комуникацијата и видливоста на проектот, како и за евалуација и ревизија на проектот. Европската банка за обнова и развој прифати да додели заем од околу 19 милиони евра за затворање на финансиската конструкција.
извор: МИА
