Пладневен преглед: Безбеден попис стартува од утре, ако дома нема никој, попишувачите оставаат порака кога повторно ќе поминат и телефонски број…

Симовски: Пописот на населението и објектите почнува утре, податоците ќе бидат објавени најдоцна за четири месеци. Директорот на Државниот завод за статистика Апостол Симовски, во интервју за МИА, вели дека по успешно спроведениот попис овој септември, нашата држава, во наредниот циклус на пописи околу 2030 година, ќе може да спроведе попис целосно базиран на регистри.

Пописот ќе се спроведе безбедно и не постои шанса за ширење на вирусот, порачаа надлежните. Попишувањето ќе се спроведе безбедно, почитувајќи ги здравствените протоколи, а попишувачите се обврзани доследно да ги применуваат. Не постои никаква шанса за ширење на заразата. Попишувањето ќе биде безбедно, со најдобра технологија, брзо и ефикасно и инклузивно на сите јазици кои се говорат во РСМ. Никој да не биде изоставен и сите да земат учество за да ја добиеме реалната слика, нагласи министерот за правда, Бојан Маричиќ.

Симовски: Нема можност некој да биде изоставен од попишување. Доколку членовите на едно домаќинство кои треба да се попишат не се дома, тогаш попишувачите оставаат порака со временска одредница кога повторно ќе поминат. Оставаат и телефонски број во случај ако лицето не е во можност во наведениот период да биде дома, да закаже со попишувачот кога може да се спроведе попишувањето.

Пристигнаа првите 200 уреди за биометриска идентификација на гласачи. Ќе треба да се обучат избирачките одбори. Прво ќе треба да се обучат обучувачи на тие избирачки одбори и поради тоа овие уреди ќе бидат полнети со фиктивни податоци од тие кои се присутни таму. Ќе се пробува како се ракува со нив за да може да бидат подготвени на денот на гласањето, изјави вчера претседателот на ДИК Александар Даштевски.

Вакцинирани 741.553 граѓани во државата. Со последните бројки, како што соопшти Министерството за здравство, 53 проценти од населението над 40 години имаат примено барем една доза вакцина и 29 посто од населението над 18-39 години е вакцинирано со барем една доза вакцина.

Заев и Николовски на увид во изградбата на електраната на биогас.

Објавени се листите со примени студенти од втора и повисоките години на студии во студентските домови, аплицирањето за бруцошите започнува од понеделник.

Од октомври почнува производство на кинеската вакцина против Ковид-19 во Србија. Лончар на белградскиот аеродром „Никола Тесла“, каде го пречека првиот контингент на суровини за производство на кинеската вакцина, рече дека на 9 септември ќе биде поставен камен -темелник за изградба на фабрика што ќе ја произведува таа вакцина.