Пишува: ЈАНЕ ЃОРЃИОСКИ
Папагалите на Мицкоски велат спремале долгорочни мерки за заштита на стандардот на граѓаните. Ќе правеле сериозни ем ГОЛЕМИ анализи за да го скротат растот на цените. Немало да дозволат народот да умре од глад.
Ич да не се секирате.
Ќе било…
ЌЕ!
Е, сеа, дури не дојде тоа ЌЕ, има да си пееме.
И нема да ни е прв пат.
Владетелите ќе го киднапираат достоинството на граѓаните со продавање евтин популизам базиран на сензитивни национални етнички наративи.
А, ние расположени, ем распеани, ем вековни.
Почнаа заветените каравани што ќе ви ја загреат „патриотската душа“.
Низ песна има да ја оплакуваат тешката судбина на Македонија, ќе тажат ропства и вековни неправди.
Ќе паѓа раја во транс набиена со патриотски занес за вемерото и сегашните војводи.
Има да си потпевнуваме додека купуваме 100 грама од најевтината салама, или една пилешка паштета и два домати.
Толку се може.
Но тоа не пречи – доволно е срцето да е полно со патриотизам!
За тоа време, овие диџеиве што ви ја сервираат Заветна како опијат – си м’цкаат шкампи, бифтеци, манго и папаја. Ние, нели, и онака не сме љубители на морска храна, ни е мачно од мрсно и ни прави киселини тропското овошје.
Затоа, нека уживаат – и тие се луѓе.
Но потоа… потоа пак истите ќе си ги гласате.
Пред тоа ќе слушате како Мицко, зачуден од новинарски прашања за исходот од изборите, со самоувереност ќе изјавува: „За тоа не станува збор, се знае дека ние победуваме“.
И навистина, драги мои заветени браќа и сестри, не знам со кој ум новинарите воопшто поставуваат такви прашања, кога одговорот одамна е запишан во „заветот“?
Ајт!
Текстот е личен став на Авторот
