Претседателот на парламентарната група за соработка со Парламентот на Босна и Херцеговина, пратеникот Зеќир Рамчиловиќ денеска во Собранието, одржа средба со претставници на Фондацијата „Алија Изетбеговиќ“ од БиХ.
Рамчиловиќ изрази задоволство од посетата и надеж дека соработката со оваа Фондација во иднина ќе биде честа и успешна и постојано ќе се унапредува.
Тој ги потенцирал досегашните блиски и пријателски односи меѓу двете земји, двата народи, како и високото ниво на правата на Бошњаците, а се осврнал и на тековниот попис на населението што се одвива во нашата земја, како и застапеноста и во сите пописни органи на Бошњачката заедница во овој попис.
Изразил уверување дека парламентарната соработка и комуникација во наредниот период уште повеќе ќе се зајакнува и во таа насока упатил апел до своите гости да ги пренесат неговите заложби како претседател на парламентарната група за соработка до неговите колеги парламентарци во БиХ.
Гостите од БиХ се заблагодариле на пријателскиот прием во земјава и истакнале дека фондацијата е основана во 2019 година и нејзината цел е да го шири и промовира делото на првиот претседател на БиХ, Алија Изетбеговиќ, кое е базирано на слободата, вистината и правдата.
Претставникот на фондацијата Фарис Наниќ истакнал дека тие се запознаени со состојбата околу правата на Бошњаците во нашата земја и недвосмислено изкажал задоволство од степенот на почитување на правата на Бошњачката заедница кој, како што рече, е на едно завидно ниво на зрелост и со европски и препознатлив начин на размислување.
Тој нагласил дека правата секогаш може да се унапредуваат и дека како држави треба да работиме заеднички на тоа, а тие како Фондација ќе вложат максимални напори во иднина околу подобрувањето на условите за образование на мајчин босански јазик.
Изразувајќи сочувство за трагедијата што се случи во Тетово, гостите од БиХ изразиле уверување дека комуникацијата и соработката ќе продолжи и во иднина.
