Ако пред две години, еден од четири платежни налози беше извршуван електронски, а останатите три на шалтерите на банките во хартија, веќе во 2020 година и во првата половина од 2021 година, секој трет налог се извршува електронски. Тоа значи дека граѓаните сѐ повеќе ги користат придобивките од електронското банкарство и електронските услуги коишто ги нудат банките, истакна вицегувернерката на Народната банка Емилија Нацевска, во гостување во утринската програмата на Националната телевизија, наведувајќи дека електронските плаќања се безбедни и носат бројни придобивки за граѓаните.
– Пандемијата го менува начинот на живеење на луѓето, а со тоа и нивните навики во начинот на плаќање. За заштита на сопственото и јавното здравје, граѓаните сѐ повеќе ги ползуваат придобивките на дигиталните плаќања, мобилните апликации и платежните картички. Ова беше особено видливо во првите месеци од пандемијата, кога растот на овие плаќања беше 110 посто и со тој интензитет продолжи и во наредниот период. Според последните официјални податоци на Народната банка во доменот на платежната статистика за првиот квартал од оваа година, бројот на плаќањата со платежни картички е повисок за 44 отсто во однос на истиот период од минатата година, посочи Нацевска.
Истакна дека користењето на платежните картички е сосема безбедно, бидејќи банките кај нас издаваат картички кои воопшто не заостануваат во технолошките решенија што се нудат во светски рамки.
– Се обезбедуваат сигурносни стандарди за извршување на плаќањата со картички и преку електронското банкарство, коишто воопшто не заостануваат со барањата во меѓународните стандарди. Сите ние сме корисници на картичките „виза“ или „мастеркард“, коишто се меѓународно брендирани и зад кои постојат навистина високи сигурносни стандарди. Ова се клучните фактори за безбедно извршување на плаќањата и оттаму, колку повеќе се ползуваат, толку помала ќе биде изложеноста и непотребното чекање пред шалтерите во банките, посочува Нацевска.
Таа најави и дека се работи на обезбедување на можноста за воведување нови, иновативни технолошки решенија ‒ финтек, кои ќе им обезбедат уште поширока палета услуги на граѓаните и фирмите.
– Се очекува дека финтек-компаниите ќе се појават наскоро, со стапувањето во сила на новиот Закон за платежни услуги и платни системи. За да се овозможи употребата на овие услуги, потребно е да се воведе концептот на „отворено банкарство“, односно отворена и сигурна комуникација на финтек-компаниите, банките и граѓаните и компаниите, како корисници на платежните услуги. За нас како држава, финтек-секторот треба да претставува можност за нашите граѓани и фирми за користење на платните услуги коишто се користат во развиените земји. Ова е голем чекор напред, големи се очекувањата, но секако ќе треба време да се оствари, посочи Нацевска.
Законската основа, како што рече вицегувернерката, ќе биде поставена наскоро, но понатаму ќе следи процесот на лиценцирање и воспоставување безбедносни стандарди, бидејќи сигурноста на средствата во банките е она што е основно и што прво треба да се обезбеди.
