Лидерот на ВМРО-ДПМНЕ, Христијан Мицкоски во предизборието најавува наводно „иновативно“ решение за гасификација на градовите со т.н. маалски резервоари, кои како што вели тој, по примерот на Арапските Емирати, ќе ги полни градско претпријатие! Мицкоски намерно не споменува дека системот кој го заговара, во Струмица го воведе тогаш најуспешниот градоначалник Зоран Заев уште од 2012 година кога со Македонија „дрмаше“ Никола Груевски.
Оттаму Мицкоски не е лошо да појде до Струмица да се запознае како функционира овој „иновативен“ систем во пракса, или ако го мрзи да оди дотаму, може да се обрати до сегашниот премиер Зоран Заев, за да му го објасни. На тој начин, одамна успешниот модел на гасификација на Заев може да му стане „нова иднина“ на Мицкоски.
Инаку во Струмица на гасоводната мрежа се приклучени повеќе од 400 физички и правни лица. Меѓу корисниците се и локалните јавни институции. Струмица е гасифицирана веќе десетина години. Гасот се носи во компресирана форма кој потоа се декомпресира и се пушта низ мрежата која е компатабилна за приклучување на националниот гасовод.
ЈП „Струмица гас“ уште лани ги почна работите за поставување на гасоводна линија до сите урбани заедници во градот откако општината со одлука на Советот обезбеди околу 420 илјади евра од Светска банка за целосно опфаќање на Струмица со гасоводна мрежа.
Д. Е.
