Признавањето дека се случил геноцид не значи дека не се случиле и други злосторства, исто како што осудувањето лице за геноцид не значи дека вината е колективна, вели советничката на генералниот секретар на ОН за спречување на геноцид, Алис Ваирим Ндерит, која беше во тридневна посета на Белград. Во интервју за српски Н1, Ндериту вели дека дебатата, како што рече, за муралот на осудениот Ратко Младиќ открива подлабоки процеси и напоменува дека за тоа треба да зборува општеството.
„Мислам дека муралот дава простор за таков разговор. Обезбедува простор, но не треба да постои. Мојот став и совет до сите со кои разговарав беше: „Ве молам отстранете го муралот“. Тоа е совет од некој што видел толку насилство и толку многу војни во светот, и затоа велам: „Отстранете го муралот“. И кога велам дека муралот треба да се отстрани, мислам и на други мурали со луѓе кои се осудени“, изјави Ндериту.
Поставувањето на муралот на Ратко Младиќ во Белград, покрена лавина реакции
Полицаец во цивилна облека пред две недели во Белград ја уапси активистката за човекови права Аида Чоровиќ, откако таа фрлила неколку јајца на муралот на Ратко Младиќ во Белград, потврдија за медиумите активисти на невладини организации кои претходно најавија дека денеска ќе го обојат муралот, но полицијата го забрани собирот поради „безбедносни причини“, пренесува Блиц.рс.
Пребојувањето на муралот го најавија Младинската иницијатива за човекови права и поранешната шефица на Фондот за хуманитарно право Наташа Кандиќ, а најавено е и учество на повеќе невладини организации од БиХ и Хрватска.
Јутарни Лист извести дека полицијата го забранила собирот со цел „да се избегнат конфликти“, а соопшти дека „го штити јавниот ред и мир“, обвинувајќи одредени медиуми „со политички интереси и цели на нивните сопственици“ дека „уште еднаш лажат и го напаѓаат МУП“.
Српскиот министер за внатрешни работи Александар Вулин, во образложението за забраната за собирот, рече дека дозвола да се соберат нема да добијат ниту оние кои имаат намера да го пресликаат муралот, ниту оние кои сакаат да го зачуваат, оценувајќи дека поканата на невладините организации од БиХ, Хрватска, Жени во црно и други да дојдат во Белград „за да ги обојат фасадите, лицемерно, се предводени од зла намера“.
Младинската иницијатива за човекови права (ЈИЧП), како иницијатор за отстранување на муралот, во отворено писмо соопшти дека ќе се откаже од акцијата бидејќи „тоа повеќе не е обичен мурал, туку споменик на Младиќ, подигнат од непознат автор, но ставен под српска заштита од страна на Министерот Александар Вулин, како и од молкот на претседателот Александар Вучиќ и премиерката Ана Брнабиќ“.
Ј. Ѓ.
