Членството на Турција, Северна Македонија и останатите балкански земји во ЕУ, е потребно од политички и економски аспект за ЕУ. Посакуваме Северна Македонија без губење време да ги започне преговорите за членство во ЕУ. Сметаме дека проширувањето на ЕУ, кое има триангулациско значење за земјите членки и државите кандидати кои преговараат, не треба да биде спречено со политички пречки и дека заедничките вредности не треба да се инструментализираат со цел вршење притисок врз одредени земји. ЕУ треба да има објективен став околу темава. Членството на Северна Македонија во ЕУ е од големо значење и за Балканот и за Европската Унија.
Ова го потенцира во интервју за МИА, Мустафа Шентоп, претседател на Големото национално собрание на Република Турција, кој вчера ја посети Република Северна Македонија, се обрати пред пратениците во Собранието, оствари средба со претседателот на Парламентот Талат Џафери, а се сретна и со шефот на државата Стево Пендаровски.
– Исто така, сакаме да се преземат чекори и во насока на искористување на војската на Северна Македонија од можностите кои ги нуди нашата одранбена индустрија, а кои во изминатиов период се претворија во меѓународен бренд. Особено вооружените беспилотни летала СИХА се сметаат за историски фактор кој ја смени воената стратегија на модерниот свет. Како Турција, секако дека посакуваме братска и пријателска Северна Македонија да го искористи ова наше искуство, вели тој во интервјуто.
Според него, безбедносната состојба во регионот, за жал, како што рече, во последниве месеци е во негативен тренд. Сеператистичката реторика и политичката криза која продолжува во Босна и Херцеговина, како и напнатите односи помеѓу Косово и Србија, оценува Шентоп, се показател на оваа состојба.
– Сметам дека нон пејперите кои циркулираа низ јавноста во април месец и кои предвидуваа промена на граници на етничка база можеби имаа поттикнувачка улога во ова. НАТО е меѓу најзначајните фактори на безбедноста на регионот. Најпрвин, како сојузници, треба да продолжиме со нашата позиција која придонесува за безбедноста и стабилноста, истакнува Шентоп во интервјуто за МИА.
Тој нагласува дека Турција ја смета Северна Македонија за пријателска и братска земја со која има моќни историски врски. Потсетува дека Турција беше меѓу првите земји која ја признаа Република Северна Македонија, и тоа со нејзиното вистинско име и идентитет. Го поддржа членството на Република Северна Македонија во евроатлантските институции, а даде голема поддршка и за членството во Организацијата на црноморска економска соработка./МИА/.
