Претседателот на Владата на Република Северна Македонија Ковачевски и претседателот на Министерскиот совет на Република Бугарија Петков денеска остварија средба на маргините на Минхенската безбедносна конференција.
На средбата, на која присуствуваа и вицепремиерот за европски прашања Маричиќ и министерот за надворешни работи Османи, беше изразено задоволство од напредокот на билатералната соработка низ активностите на работните групи и конкретните активности за соработка кои произлегоа до сега.
Двајцата премиери најавија интензивирање на соработката и дијалогот и за прашањата за кои треба да се најдат решенија на политичко ниво, во периодот кој следува.
За двете земји и за граѓаните од најголема придобивка е што поскоро да се дојде до квалитетни решенија поддржани и прифатени од двете страни.
Како сојузници во НАТО, премиерите Ковачевски и Петков споделија дека од посебно значење е и безбедносната состојба во регионот на Западен Балкан и Европа и се согласија дека и интеграцијата на Северна Македонија во ЕУ е фактор за општата безбедност и сигурност.
