Со своите одлуки за признавање на „независноста“ на окупираните делови на Доњецката и Луганската област, Русија ги нарушува суверенитетот и територијалниот интегритет на Украина и ги легализира своите трупи во Донбас, кои се наоѓаат таму од 2014-тата година. Ова го изјави претседателот Володимир Зеленски во своето обраќање по состанокот на Советот за Национална Безбедност и Одбрана.
„Украина недвосмислено ги квалификува неодамнешните дејствија на Руската Федерација како кршење на суверенитетот и територијалниот интегритет на нашата држава. Целата одговорност за последиците од овие одлуки е на политичкото раководство на Русија“, нагласи Шефот на државата.
Покрај тоа, според него, признавањето на „независноста“ на окупираните делови на Доњецката и Луганската област може да значи еднострано повлекување на Русија од договорите од Минск и игнорирање на одлуките во рамки на „Нормандиската четворка“.
„Тоа ги поткопува мирните напори и ги уништува постоечките преговарачки формати. Со денешните и утрешните можни решенија Русија ги легализира своите трупи кои всушност се наоѓаат во окупираните делови на Донбас од 2014 година. Земја која осум години ја поддржува војната, не може да го одржува мирот, како што таа тврди“, истакна Претседателот на Украина.
Володимир Зеленски извести дека ја дискутираше ситуацијата со Претседателот на Франција Емануел Макрон, канцеларот на Германија Олаф Шолц, Претседателот на САД Џозеф Бајден, Премиерот на Обединетото Кралство Борис Џонсон и Претседателот на Европскиот совет, Чарлс Мишел. Исто така се планира и телефонски разговор со Претседателот на Турција Реџеп Таип Ердоган.
Тој истакна дека денес МНР на Украина испратило барање до земјите-членки на Советот за безбедност на ООН врз основа на Будимпештскиот меморандум со барање за итно одржување на консултации. Исто така беше иницирано и одржување на седница на Советот за безбедност на ООН и посебна седница на ОБСЕ.
„Инсистираме на целосна работа на СММ на ОБСЕ со цел да се спречат провокации и натамошна ескалација“, нагласи Претседателот.
Покрај тоа, според Володимир Зеленски, иницирано е итно свикување на самитот на „Нормандиската четворка“.
„Очекуваме јасни и ефективни чекори за поддршка од нашите партнери. Многу е важно сега да видиме кој е нашиот вистински пријател и партнер, а кој ќе продолжи да ја заплашува Руската Федерација со зборови“, истакна Шефот на државата.
Претседателот увери дека Украина е посветена на политичко-дипломатско решение и не подлегнува на провокации.
„Можеме јасно да разликуваме провокации и офанзива на трупите на агресорот. Со нас е вистината. И ние никогаш нема да ја криеме вистината од вас. Штом ќе видиме промена на ситуацијата, штом ќе видиме зголемување на ризиците – вие ќе знаете за сето ова. Во моментов нема причина за хаотично дејствување. Ќе направиме се за да остане така и понатаму“, рече Володимир Зеленски.
Шефот на државата им се заблагодари на сите граѓани на Украина, кои повторно докажуваат дека Украинците се паметна и мудра нација и, покрај се, се уште се со ладна глава, реагираат смирено и промислено.
„Ние одамна сме подготвени на се. Но, причини за ваша непроспиена ноќ нема“, истакна Претседателот.
