– Државната гранична служба на Украина информира дека агресијата на Русија се случи денеска околу 5.00 часот. Нападот исто така се случи и од страната на ТОТ на Автономната Република Крим. Во моментов преку административната граница се евидентира движење на воена опрема од полуостровот, информираат од украинската амбасада во Скопје.
Оттаму соопштуваат дека во Луганската, Сумската, Харковската, Чернигивската и Житомирската област, нападите врз граничните единици, граничните патроли и контролните пунктови се вршат со употреба на артилерија, тешка техника и огнено оружје.
„На офанзивата на руските војници преку државната граница и претходи артилериски оган, а потоа се движи воена техник.а
Руската воена техника, вклучително и оклопни возила, ја наруши државната граница во Чернигивската, Сумската, Луганската и Харковската област.
Конкретно, во Чернигивската област, непријателската техника минуваше низ контролните пунктови „Сенкивка“ и „Гремјач“ и во други правци“, известуваат од амбасадата.
Нагласуваат дека движењето на колоните се одвивало и преку контролниот пункт „Бударки“ во Харковската област и во правец на контролниот пункт „Милове“ во Луганската област.
Како што пренесува украинската амбасада, повеќето гранични единици и гранични патроли на Луганската, Сумската, Харковската, Чернигивската и Житомирската област биле под оган.
„Според достапните информации, меѓу граничарите се повредени голем број војници.
Војниците на Државната гранична служба на Украина заедно со Вооружените сили ги преземаат сите мерки за запирање на непријателот“, стои во информацијата од украинската амбасада.
