– Во изминатите пет години преземавме обврска да спроведеме европски реформи и не сме застанале со нивната реализација, со цел да им обезбедиме на нашите граѓани европски стандарди и да ја приближиме земјата кон ЕУ и во овој аспект соработката со Советот на Европа, преку одличната комуникација со Канцеларијата во Скопје, има посебен удел во исполнувањето на тие реформи, преку спроведувањето заеднички проекти, комплементарни на реформската агенда, истакнал вицепремиерот Маричиќ.
Маричиќ и Буриќ, како што соопшти СЕП, потврдиле дека Северна Македонија и Советот на Европа остануваат партнери во зачувување на европските вредности и дека делат исти приоритети на полето на човековите права, демократијата и владеењето на правото.
Генералната секретарка на Советот на Европа изразила очекување дека Владата, како и досега, ќе продолжи со конструктивната соработка со бројни експертски тела на Советот на Европа со цел да придонесе за постигнување на основните цели.
Таа, како што е наведено во соопштението, смета дека се направени многу крупни чекори и постигнати се конкретни и одржливи резултати преку реализацијата на европската агенда.
Маричиќ накратко ја информирал Пејчиновиќ-Буриќ за приоритетите во процесот за приближување кон европските стандарди за претстојниот период и во тој контекст заеднички ги разгледале можностите за унапредување на соработката во спроведување на новите проекти за поддршка на реформите кои се предвидени од страна на Владата.
Двајцата се согласиле дека Северна Македонија ги исполнува сите услови за почеток на преговорите, што се потврдува и во Извештајот за напредокот од страна на Европската комисија, но и во меѓународните извештаи како Транспаренси Интернешнал, Фридом хаус, ГРЕКО и други, како и дека е од интерес и на земјата и на Унијата да се отстранат сите пречки за отпочнување на пристапните преговори.
Соговорниците размениле мислења за актуелната ситуација во Украина, а Пејчиновиќ-Буриќ го информирала вицепремиерот Маричиќ за активностите што ги презема Советот на Европа.
извор: МИА
