Нема да има прекин на огнот во Украина ниту за време на претстојните Велигденски празници, иако имаше надеж дека големиот христијански празник ќе биде причина народот да добие мир, пишува Би-би-си по вчерашната изјава на украинскиот претседател Володимир Зеленски кој во своето обраќање кажа дека руските дипломати го одбиле нивниот предлог за мирување на воените дејствија за време на празникот.
„За жал, Русија го отфрли предлогот за воспоставување на Велигденско примирје. Ова многу добро покажува како лидерите на оваа држава всушност се однесуваат кон христијанската вера. На еден од најрадосните и најзначајните празници. Но, ние остануваме со надеж. Надеж за мир, надеж дека животот ќе ја победи смртта“, порача Зеленски во синоќешниот говор.
Украинскиот претседател им се заблагодари на посетата и поддршката на данскиот и шпанскиот премиер како и на САД што најави нов пакет за поддршка со артилерија, гранати, беспилотни летала. Ова беше веќе 26-то обраќање пред парламентите на земји-партнери со Украина што Зеленски го оцени како успешно и додаде дека на тој начин се приближува до одлуката за обзебедување помош за Украина.
Денешниот 58-ми ден од почетокот на руската инвазија врз Украина донесе нови сателитстки снимки снимени во близина на пристанишниот град Мариупол каде се покажуваат масовни гробници за кои американската компанија што ги снимила и објавила снимките тврди дека се појавиле во периодот од 23 до 26 март. Според снимките се проценува дека ново пронајдените се околу 200 гробови во кои како што изјави градоначалникот на Мариупол, Вадим Бојаченко може да се закопани околу 9000 цивили, јавува новинската организација Ал Џезира.
Бојаченко најостро ги коментира новите снимки со гробниците што се наоѓаат 20 километри западно од Мариупол, обвинувајќи ја Руската Федерација за предизвикување на најголемото воено злосторство на 21-от век во Мариупол.
„Ова е новиот Баби Јар, тогаш Хитлер ги убиваше евреите, ромите и словените, а сега Путин ги убива украинците. Ова бара силна реакција од светот, геноцидот мора да биде запрен по секоја цена“, изјави Бојаченко споредувајќи ги гробниците на снимките со Баби Јар каде во 1941 година од страна на нацистите биле извршени повеќе групни масакри врз украинските евреи.
Во меѓувреме, заменикот генерал на централниот воен округ во Русија, Рустам Минекаев изјави дека една од целите на Русија во втората фаза од специјалната воена операција е да воспостави целосна контрола над Донбас и Јужна Украина. На овој начин ќе се обезбеди копнен коридор до Крим и истото ќе има витално влијание врз украинската економија.
Украинското државно обвинителство денес информира дека за време на воениот конфликт меѓу Русија и Украина биле убиени 208 деца, а повредени биле 386 и притоа се нагласува дека овие бројки не се конечни, јавува Укринформ.
Рекации има и од канцеларијата за човекови права на Обединетите Нации (ОХЦХР) од каде алармираат за зголемените докази за воени злосторства и бараат Кијив и Москва да им наредат на борците да го почитуваат меѓународното право.
„Руските вооружени сили неселктивно гранатираа и бомбардираа населени места, убивајќи цивили и уништувајќи болници, училишта и други цивилни инфраструктури и сите тие се дејствија што може да претставуваат воени злосторства“, велат од ОХЦХР.
Оттаму додаваат дека се документирани и неселктивни употреби на оружје од стрна ана украинските сили во источниот дел од земјата.
Извор: МЕТА
