Пишува: АНДРЕЈ ЖЕРНОВСКИ
Ниту една политичка партија не напушта влада која е успешна. Никаде и никогаш. Напротив, се заминува тогаш кога таа влада нема резултати. Или најчесто, кога има, но катастрофални.
Така е (дури) и кај нас.
Арбен Таравари вчера соопшти дека органите и телата на Алијанса за Албанците едногласно одлучиле да си заминат од Владата.
Да се потсетиме. Тоа не е било кој политичар, туку клучната фигура со чија кандидатура на последните претседателски избори дојде до целосен пресврт во албанскиот политички кампус, што повлече одлучувачки импликации и врз целокупниот.
Владата на Мицкоски ја напушти не било која партија, тука главниот senior partner. А тоа кажува многу, да не речам се’.
Таравари потенцира дека одлучиле да излезат од Владата за да се вратат кај народот. Сурово и прецизно опишана реалност, бидејќи оваа влада по само неколку месеци од својот мандат “успеа” да се отуѓи од граѓаните, од оние кои и’ дадоа огромна доверба, кои веруваа во неа.
По само неколку месеци, стана јасно дека оваа политичка гарнитура ги погази сите, ама буквално сите предизборни ветувања. Наместо да ги направи ГОРДИ граѓаните, ги понижи, нарекувајќи ја Македонија “нашата земја”. А друго се ветуваше, зарем не?
Ги понижува секојдневно со веќе неподносливата економска состојба, во која слободно дивеат цените на основните прехранбени производи, не презимајќи никакви мерки за да ги стабилизира цените.
Во право е професорот Узунов кога вели дека Македонија ја живее најлошата економска состојба во последниве децении.
Сведоци сме на девастирана бизнис клима, во која 9 месеци нема враќање на ДДВ и плаќање на обврски кон стопанството
Што да кажеме за дезориентираната надворешна политика која, во очигледна немоќ, се претвори во туристичка дипломатија. Повторно станавме изолирана држава, никој веќе не ни доаѓа во посета.
Сведоци сме на афери на актуелни министри и директори кои веќе не можат ни да се набројат, се’ збогатено со безброј примери на непотизам, за кои веќе нема ни деманти.
Едно нешто требаше да знае Мицкоски, а тоа е дека што поголема доверба добиеш од граѓаните, толку е поголемо нивното разочарување кога ќе ги разочараш и излажеш.
Сега, по сето ова, тој останува со само еден крајно нестабилен junior partner, каде е прашање на време кога ќе излезат на површина внатрешните превирања.
Да заклучиме. Некогаш големото парламентарно мнозинство почна да се ситни. Тоа е процес кој ќе продолжи да трае и кој ќе донесе дополнителна нестабилност во функционирање на Владата. Оттаму, смело, се надевам не и арогантно, ќе си дозволам да прогнозирам три работи:
– Дополнителен број на пратеници од ВРЕДИ кои ќе преминат на другата страна.
– Поделба во пратеничката група на ЗНАМ.
– Следствено на сето ова, вонредни парламентарни избори, кои ќе се одржат заедно со локалните, но поверојатно идната пролет.
