Министерството за образование и наука информира дека денеска е извршена исплата на средства за субвенциониран студентски оброк за месец април. Средствата се префрлени на трансакциските сметки на повеќе од 28 илјади студенти кои го имаат остварено ова право на некој од досегашните објавени повици за пријавување.
Од МОН потсетуваат дека во периодот од 20 до 30, односно 31 во секој месец е отворена можноста за аплицирање за остварување на правото на субвенциониран студентски оброк за сите оние студенти кои претходно не ги исполнувале условите, или од кои било причини не аплицирале.
Пријавувањето за субвенциониран студентски оброк е дигитализирано, односно се спроведува исклучиво електронски преку порталот https://e-uslugi.mon.gov.mk/ и многу едноставно, со прикачување на само два документи – пријава и изјава за точност на податоци и се наведуваат податоци за лична трансакциска сметка, наведуваат од Министерството за образование и наука.
