Собранието на Република Северна Македонија попладнево расправаше за Предлог законот за изменување и дополнување на Законот за земјоделство и рурален развој, со кои треба да се овозможи исплата на субвенции на производителите на тутун, jaвува МИА.
Опозициската ВМРО-ДПМНЕ го поддржува донесувањето на измените на Законот, но, инсистира на, како што рекоа повеќето пратеници, „прекинување со манипулациите со субвенциите“. Според нив, штрајковите покажуваат дека земјоделството е на колена, а, како што велат, власта лошо се справува со актуелните предизвици.
Мнозинството на СДСМ, пак, посочи дека субвенциите во земјоделството постојано се зголемуваат, а земјоделците се особено задоволни од неселективниот пристап, кој, според нив, во минатото често се практикувал.
Пратеникот од СДСМ, Панчо Минов во врска со изјавите за манипулацијата со субвенциите од страна на опозициските пратеници, посочи дека проблемот е во откупувачите.
– Земјоделците не се незадоволни од Владата, таа си ги има исполнето сите обврски, проблемот е во откупувачите, проблемот е во пазарите. Она што значи субвенции и помош, што го дава државата е сè субвенционирано, рече тој.
Миле Лефков од ВМРО-ДПМНЕ истакна дека не се сомнева во, како што рече, „добрите намери на ова законско решение на предлагачите“.
– Она во што се сомневам и претходно го имам кажано е каде е министерот за земјоделие, се крие министерот за земјоделие, рече тој.
Предлог законот за изменување и дополнување на Законот за земјоделство и рурален развој е на дневен ред на 64. седница на Собранието, која, според најавите, продолжува утре во 11 часот.
Министерството за земјоделство, шумарство и водостопанство денеска преку соопштение повторно апелираше да се усвојат законските измени, посочувајќи дека со тоа директно ќе им се помогне на преку 20.000 семејства кои живеат од производство на тутун. Ќе се овозможи, како што наведоа, уште утре да се реализира исплата на субвенциите.
