На фотографијата е споделен текст на англиски јазик, од книга, со сексуална содржина и фотографија од двајца млади кои имаат интимен однос. Книгата, иако предизвика огромни негативни реакции од родителите во Велика Британија, сепак не е учебник за шесто одделение и не претставува дел од наставната програма во британските училишта. Според пишувањата на британските медиуми, меѓу кои и Дејли Мејл, станува збор за книга која предизвикала бројни негативни реакции кај родителите, бидејќи е наменета за деца на мала возраст, од 4 до 8 години, пишува Вистиномер.мк.
Рецензираме пост објавен на социјалната мрежа Фејсбук во кој, преку споделена фотографија, се тврди дека е претставен учебник за шесто одделение во кој брат и сестра водат љубов.
На фотографијата е споделен текст на англиски јазик, од книга со сексуална содржина и фотографија од двајца млади кои имаат интимен однос. Книгата, иако предизвика огромни негативни реакции во Велика Британија, сепак, не е учебник за шесто одделение и не претставува дел од наставната програма во британските училишта. Таа е преведена од германски јазик.
Дополнително, во текстот не станува збор за тоа дека брат и сестра водат љубов, наспроти изнесеното во постот што го рецензираме. Според пишувањата на британските медиуми, меѓу кои и Дејли Мејл, станува збор за книга која предизвикала бројни негативни реакции кај родителите, бидејќи е наменета за деца на мала возраст, од 4 до 8 години. Причината за негативните реакции на родителите е тоа што во книгата експлицитно се објаснува сексуален однос. Дејли Мејл наведува дека книгата е насловена „Моето тело се развива” од 64-годишната авторка Дагмар Геислер, а во неа има детално опишани пасуси за сексуалните односи, што ги мотивирало родителите да побараат од училиштата каде учат нивните деца целосна листа на достапните книги, за да се уверат дека книгата ја нема во училишните библиотеки.
Шокирани мајки и татковци ја нападнале авторката Дагмар Геислер, откако прочитале делови од нејзината книга која наликувала на порнографски материјал, пишува Дејли Мејл.
Книгата опфаќа и содржини за различни форми на контрацепција, вклучително и за таблети за контрацепција. Дејли Мејл додава дека стотици гневни родители го нападнале авторот онлајн откако делови од книгата биле споделени на социјалните мрежи. За жестоките гневни реакции на родителите пишува и британски Сан.
Иако во книгата навистина е опишан секс меѓу девојка и момче на исклучително живописен начин, сепак, таа не е дел од наставна програма во Велика Британија, како што се тврди во постот што го рецензираме.
Книгата се продава на Амазон и опишана е како „водич за деца во претшколска возраст и во почетните години на основното образование, со цел да поучи дека не сме толку различни, без разлика дали станува збор за момчиња или за девојчиња“.
Иако од надвор можеби изгледаме слично, сите сме внатрешно своја сопствена личност. На оваа возраст, нашите тела и умови се менуваат како што растеме. Со запознавањето на учениците од класот 4 Б, младите читатели ќе научат како нивните умови и тела функционираат. Ќе научат за пријателствата, стереотипите за половите и за правата што ги имаат како деца, пишува во книгата, а објавува Дејли Мејл.
Авторката исто така во книгата ја адресира сексуалната злоупотреба и зошто е важно таа да се пријави на возрасен. Се додава дека читателите ќе се запознаат со темите на пубертетот, заљубувањето, сексот и забременувањето.
Книгата кај родителите предизвика бројни и жестоки негативни реакции. Сепак, не станува збор за задолжителна литература и не е дел од наставната програма во училиштата во Велика Британија. Во книгата, исто така, наспроти шокантното тврдење во постот, не е опишан секс меѓу брат и сестра. Поради сите горенаведени факти, оценуваме дека не е вистина дека претставената фотографија илустрира учебник за 6 одделение од Велика Британија во кој брат и сестра водат љубов.
