Видеото што се споделува на Фејсбук е со невистинита содржина и монтирано, односно директорот на БЈБ, Сашо Тасевски во својата изјава никаде не споменува дека „Македонците ги нападнале мирољубивите Албанци“. Од оригиналното видео на телевизиски прилог, може да се чуе целата изјава на Тасевски, кој во ниту еден момент не споменува Македонци или Албанци, ниту пак тврди дека за време на протестите „биле нападнати Албанци кои си стоеле мирно“.
Анализира Вистиномер.
Во објава на Фејсбук се тврди дека Сашо Тасевски, директор на Бирото за јавна безбедност изјавил дека „Македонците ги нападнале мирољубивите Албанци во скопската чаршија“. Објавата се однесува на инцидентите кои се случија на 6 април за време на протестите против францускиот предлог за почеток на пристапните преговори со ЕУ, кога на плоштадот Скендербег лицето Е.Ј. (40) извади пиштол и испука неколку куршуми, а дојде и до поголем судир меѓу групата лица и демонстрантите.
Во постот на Фејсбук, кој е придружен со медиумски запис од веб-порталот Скопје 1, каде е споделено и видео, пишува:
Ако молчиме како до сега, вака си ПОИГРУВААТ со нас! Сашо Тасевски, директор на Биро за Јавна Безбедност, човекот кој извади самиот пиштол во собрание против својот народ, за време на 27ми Април, изјавува сега дека Македонците ги нападнале мирољубивите албанци во чаршија.
КОЈ ГИ РАЃА ВАКВИ???
Станува збор за невистинa, односно за манипулирана, изменета содржина, односно директорот на БЈБ, Сашо Тасевски во својата изјава никаде не споменува дека „Македонците ги нападнале мирољубивите Албанци“. Видеото што се споделува е монтирано (altered content) и тоа може да се препознае и по гестикулациите на Тасевски, односно лесно може да се согледа дека тој не ја отвора устата во согласност со она што лицата кои го монтирале видеото сакале да го прикажат.
Видеото е објавено на Фејсбук страницата Македонски национален фронт со наслов „Директорот на БЈБ: Масата народ сакаше да ги нападне Албанците“ и истото има над 29 илјади прегледи, повеќе од 100 коментари и околу 180 допаѓања.
Во монтираното видео, кое се однесува на тоа дали полицијата навремено и професионално одговорила за да ги спречи инцидентите, директорот на БЈБ наводно изјавува:
Тоа е од одреден ваш агол, кај што не ги гледаат сите полицајци. Таму има и во цивилка полицајци. Има и од крим полиција. Гледате колку е масата насилна и колкава бројка сака да ги нападне Албанците што си стојат мирно граѓаните.
Од логото на видеото може да се види дека истото е преземено од телевизија „Алфа“. Но, ако се отвори оригиналното видео од телевизискиот прилог, може да се чуе целата изјава на Тасевски, кој во ниту еден момент не споменува Македонци или Албанци, ниту пак тврди дека „биле нападнати Албанци кои си стоеле мирно“.
Во 1.44 минута од прилогот се емитува оригиналната изјава на Тасевски кој вели:
Тоа видео е од одреден ваш агол, каде што не се гледаат сите полицајци. Таму има и во цивилка полицајци, има и од крим полиција.
На прашањето на новинарот „како реагираат полицајците на инцидентот“, Тасевски одговара, „па еве гледате“, на што новинарот вели „не гледаме“, а Тасевски одговара, „па за тоа зборувам“. И тоа е целата изјава што може да се чуе од директорот на БЈБ во однос на инцидентот и начинот на кој реагирала полицијата.
Оттаму, поради горенаведените факти, може да се заклучи дека објавата што се шири на социјалните мрежи, а ја презеле и некои медиуми е со невистинита содржина, а видеото е монтирано, со цел граѓаните да бидат доведени во заблуда и изманипулирани дека наводно директорот на БЈБ зазема страна во однос на инцидентите кои се случија на 6 јули на плоштадот „Скендербег“.
Инаку, вооруженото лице кое испука неколку куршуми за време на инцидентите беше приведено, а Основниот кривичен суд му одреди осумдневен притвор.
