Опозициската партија Левица ги повика граѓаните на масовен протест и блокада пред Собранието. Неофицијално, пред Собранието ќе има трактори, булдожери и други превозни средства за да се спречи усвојувањето на „францускиот предлог“.
„Во Собранието е закажана Пленарна седница на која свое обраќање ќе има Претседателката на Европската комисија, Урсула Фон дер Лајен која ќе ги убедува пратениците да го изгласаат понижувачкиот предлог со кој се оспоруваат сите атрибути на македонското постоење. Го повикуваме народот, утре во 12 часот, масовно да излезе пред Собранието на Република Македонија и да ѝ каже гласно „НЕ“ на Претседателката на ЕК и народните избраници за бугаризација на Македонија. Нема да ви пројде!“, пишува во повикот на Левица.
Во истото време, на пладне, на протести излегува и ВМРО-ДПМНЕ. Во нивниот повик пишува дека преку протестот ќе порачаат дека Македонија не е на продажба.
„Да излеземе масовно, да протестираме мирно и достоинствено. Пред Собранието на Република Македонија во 12 часот. Да порачаме дека Македонија не е на продажба!“, пишува во објавата на ВМРО-ДПМНЕ.
Улицата „11 Октомври”, пред Собранието на Република Северна Македонија утрово е затворена за сообраќај поради најавениот протест против францускиот предлог, а се забележува и засилено полициско обезбедување. Од вчера се поставени и шатори од страна на дел од демонстрантите за кои Левица пишува дека биле претресувани од МВР.
Со оглед на неколкуте обиди за насилни демонстрации, гилотини пред Влада и Собрание, скандирање против „клетите шиптари“, фрлање молотови коктели, пукањето кај Скендербег, повредените припадници на полицијата, МВР упати апел за мирни протести. Министерот за внатрешни работи Оливер Спасовски, повторно потенцираше дека протестите не се уредно пријавени.
„И денеска како и сите изминати денови откако почнаа ненајавените протести, упатувам апел за практикување на мирен протест како дел од дијалогот. Иако ниту вечерашниот, ниту протестите во изминативе неколку дена не беа уредно пријавени, наспроти неодговорноста на организаторите, повикувам на свесност и одговорност во постапките. Никогаш поважни и порешавачки не биле европските вредности и социо-културни манири од сега – моментум кога демократските процеси мора да течат непречено. Почитувани граѓани, Македонци, Албанци, Срби, Турци, Роми, Власи, сите граѓани на Република Северна Македонија, Ве уверувам, македонската полиција останува на нивото на својата задача во заштитата на уставно загарантираното право на протест на граѓаните и, секако, на безбедноста на институциите и граѓаните“, пишува во објавата.
За денеска е предвидено премиерот Димитар Ковачевски да се обрати на 81-та седница на Собранието на која ќе се расправа за Информацијата за содржината на Предлог преговарачката рамка за пристапните преговори со Европската Унија, предложена од страна на Претседателството на Франција со Советот на Европската Унија.
Ковачевски во интервју за МИА вчера изјави дека од пратениците очекува да размислуваат државнички, како претставници на народот, а не само на партиите.
„За одлуката во Собранието, очекувам плодна и суштинска дискусија, очекувам дека пратениците ќе бидат на ниво на задачата, која е пред нив и дека ќе размислуваат државнички и трезвено, како им доликува, како претставници на народот, а не само на политичките партии“, вели Ковачевски.
Ковачевски нагласи дека во Собранието најпрво ќе се отвори дискусија, а потоа и ќе се донесат заклучоците, со кои ќе се задолжи Владата да постапува согласно одредени принципи од кои нема да смее да отстапи, а сѐ со цел заштита на позициите, кои, како што рече, нам како држава ни се најважни во целиот овој процес.
Претходно, Собранието ќе ја одржи 80 седница на која ќе се обрати претседателката на Европската комисија Урсула фон дер Лајен, која е во посета на земјава. Како што е најавено, на седницата поканети и претставници на дипломатскиот кор.
Според информации од Собранието, се очекува седницата да трае два дена. Иако за прифаќање на францускиот предлог се потребни 41 глас, се очекува тој да добие поддршка од околу 70 пратеници, односно од владејачките СДСМ, ДУИ, Алтернатива и ДПА, како и од опозициските Алијанса за Албанците и Беса. Против францускиот предлог се ВМРО-ДПМНЕ и Левица, додека неизвесно е како ќе се изјаснат четирите пратеници од ЛДП, ДОМ и од ДС, пишува Слободен печат.
И. З.