Во среда, на 7 септември, ќе се одржи голем еднодневен настан во организација на тимот на EXIT во соработка со градот Струмица, на кој ќе настапат познати меѓународни и регионални музички ѕвезди. Местото, комплетната листа на изведувачи и датумот на почетокот на продажбата на билетите ќе бидат објавени наскоро.
Уникатниот концепт на музичкиот настан Get EXITed беше претставен на денешната прес-конференција во Струмица, на која пред новинарите се обратија градоначалникот на Струмица, Коста Костадинов и претставници на фестивалот EXIT.
„Get EXITed ќе пристигне во Струмица на 7-ми септември! Ветуваме многу дружење, добра музика и пријатни изненадувања. Ги повикувам сите од Балканот да дојдат во Струмица за да можеме заедно да започнеме едно убаво ново поглавје на нашиот отворен Балкан“, изјави во оваа прилика градоначалникот на Струмица, Коста Костадинов.
„Од основањето на EXIT, постојат силни врски меѓу Македонија и нашиот фестивал. Овие врски ги негуваме веќе две децении, а сега е време да дојдеме и ние во вашата куќа! Бидејќи врските меѓу нашите земји се нераскинливи, токму поради нашата заедничка историја и култура, воодушевени сме што Македонија конечно се приклучува на семејството на EXIT настани, а музичкиот настан Get EXITed во септември во Струмица го означува почетокот на оваа соработка. Една од примарните визии на овој проект е увертира за создавање на нов македонски фестивал следната година, кој ќе стане нова важна туристичка атракција на Балканот. Но, во моментов, нашиот фокус е на големата забава Get EXITed. Возбудени сме што конечно ќе се собереме со нашата екипа од Македонија“, велат од тимот на EXIT.
Get EXITed, како концепт за еднодневен музички настан, ќе послужи како одлична увертира на првото издание на големиот македонски фестивал планиран за следната година. EXIT е најголемата организација на музичката индустрија во Југоисточна Европа, со девет фестивали во седум земји. Освен главниот фестивал, кој традиционално се одржува во Нови Сад повеќе од 20 години, EXIT досега организираше бројни фестивали и големи концерти, како фестивалот No Sleep во Белград, Sea Dance и Ada Divine Awakening во Црна Гора, Revolution во Романија, Sea Star во Хрватска, Echowaves во Грузија, Фестивал 84 во Босна и Херцеговина, Sunland на плажата Перла во Бугарија, концерти на Роби Вилијамс и Мадона во Белград, Red Hot Chili Peppers во Inđija и многу други.
Мисијата на EXIT од своето основање е да го поврзе регионот и да промовира мир, како и да ги промовира брендовите на локациите домаќини и да го зголеми нивниот препознатлив имиџ.
